"Hêrîşê nîjadperestî yê ke kurdê ke metropolanê Tirkîya de cuyenê dewam kenê.

Nê çend rojanê peyênan de şaristananê Afyon, Konya û Anqara de nijadperestê tirkî hêrîşanê nêmerdimayî keyeyanê Kurdan rê kenê û netîceyê hêrişan de Konya de Kurdo bi namê Hakim Dağ ame kiştiş û hîrê şaristanan de zaf kesî zî keyeyanê cîya-cîyayan ra birîndar bîyê.

Her çiqas îdarekerê Dewleta Tirkiya wazenê sebebê nê hêrîşansey cîya nîşan bidê û sey hêrîşê munferîtî nîşan bidê zî, zaf aşkere yo ke, ê kesê ke nê hêrişî kerdê bi slogan, vatiş, çînayîşê nengan nîjadperestî bîy nê hêrişî vera kurdan kerdê.

Nê hêrîşî verê cû zî bibî û tu kes semedê nê hêrîşan ceza nêgirewt. Her hêrîş de hêzê asayîşî xo kerdî ker û lal, bêveng mendê, yan zî rayîrê hêrişan akerd.

Nê hêrîşê nîjadperestî berhemê sîyasetê Dewleta Tirkîya ya şowen ya vera kurdan ê.

Seba na rastîye zî heme îdarekarê Dewleta Tirkîya, dezgehê asayîşî, dezgehê çapemenî û têkilîye, sîstemê perwerdehî  nê hêrîşan ra mesûl ê, sûcdar ê. Heto bîn ra heme partîyên mixalefetî, dezgehê sivîlî û kesê namdarî êyê ke vera nê hêrîşan bêveng manenê zî nê hêrişan ra mesul ê.

Gereke îdarekerê Dewleta Tirkîya zî, hêzê nîjadperestî yê dişmenê miletê kurd zî baş bizanê ke, miletê kurd hetanî wro sereyê xol vera tu jenosîd, qetlîam, kişyayîş, zulum û zordarî çewt nêkerd û do nika ra tepîya zî sereyê xo vera dagirker û nîjadperestan netewno. Do tu hêrîşêk nêeşko vernîya rayîrê azadî, xelasî, xoserîya welatê ma bigîro.

Ma baş zanê ke nê hêrîşê ke şaristananê  Tirkîya de kurdan rê benê, dewamîya sîyasetê jenosîdkar yê ser miletê kurd ê.

Ma na bawerîye de yê ke, gama yewine ya vera nê hêrişan, hemkarî û îtifaqê neteweyî, niştimanî yo û na mesela de mesûlîyêka tarîxî kewena milê heme partî, rêxistin, grûp û dezgehê kurd û kurdistanîyan ser. 

Ma venga pawitoxanê heqanê merdiman û heme hêzanê azadîwaştox, demokrat, edaletpawitox yê Tirkiya danê ke wa vera nê hêrîşan bêveng nêmanê. Hêrîşê ser şarê kurd, eynî wext de hêrîşê ser azadî û sibarojê şima yo zî. Heto bîn ra nîjadperesti sûcêkê vera merdimayî ya û vernîya averşîyayîş û cûyêka birûmete ya her miletî zî gêna.

Ma sey 5 partî û hereketê ke cêr de nameyê înan estê, keyeyê Hekim Dal rê serweşî û şîfaya xêrî birîndaran rê wazenê.

Ma nê hêrîşanê nîjadperestî û nêmerdimayî şermezar kenê."

22.07.2021

PÊLKURD, PSK, TEVGER, PAK, PDK-BAKUR