Navenda Nûçeyan - Alîkarê Wezîrê Berevanîyê yê Amerîka Jonathan Rath Hoffman di konferanseke rojnamevanî de ragihand, helwesta Pentagonê ji destpêkê ve aşkere bû, heger Tirkîye sîstema berevanîyê Patriot dixwaze, divê mûşekên S-400 ji Moskoyê re vegerîne.

Ev daxuyanîya wî berpirsê Pentagonê piştî wê tê, Serokomarê Tirkîyê Recep Teyip Erdogan ragihandibû, helwesta Amerîka li hember kirîna Tirkîyê ji sîstema S-400 re sivik bûye.

Erdogan roja 5ê vê mehê tekez kiribû, sîstema berevanîya esmanî S-400 dê di meha Nîsana bê de bikeve kar.

Tirkîyê di sala 2017an rêkeftina mûşekên S-400 bi Rûsyayê re îmze kiribû û pêvajoya radestkirina mûşekên S-400 bo Tirkîyê di 12ê Tirmeha 2019 de destpê kiribû

Kirîna mûşekên S-400an ji Rûsya di navbera Amerîka û NATO û Tirkîye de alozîyên mezin peyda kirine. NATO û Amerîka hewl didin Tirkîye dest ji bikaranîna wê berde.

Amerîka jî mûşekên S-400 wek sîstemeke neyar dizan e û ji ber vê, Tirkîye ji projeya firokeyên F-35 dûr xist.

Basnews