Eşkera bi ke qezaya Pîranî ya Amedî de dibistane de mamosta D.B.yî 7 wendekarê kênayî tacîz kerdî. Derheqê D.B.yî de çîyêk nêame kerdene, 7 wendekarî tersî ra hewteyêk o nêeşkenê şorê dibistane.

Qezaya Pîranî ya Amedî de dibistanêke de eşkera bi ke mamostayê camêrdî D.B.yî 7 gedeyê kênayî tacîz kerdî. Pêrodayîşê sinife ra dima wendekaranê lajan serebût vet werte.

4ê teşrîna verêne de 4 wendekarê 9 serrî şîyî Qereqolê Cendirmeyan ê Pîranî û tîya ra zî semedê îfade şîy Merkezê Çimdarîya Gedeyan (ÇÎM) ê Amedî. Dîya zanayîş ke semedo ke pedagog camêrd bi û gedeyî tersayî nêeşkayî îfade bidê. Dima ke gedeyan keyeyanê xo rê qala îstîsmarê cînsîyî kerd keyeyan gerreyê mamostayî kerd. La derheqê D.B.yî de çîyêk nêame kerdene, 7 wendekarî tersî ra nêeşkenê şorê dibistane.

Dadîye S.K.ya ke kênaya ci ya 9 serre maruza tacîzî bîya wina qala serebûtî kerde: ''Wexto ke ma serebût eşnawit kênaya xo arde keye la semedo ke binê tesîrî de nêmana ma tira çîyêk pers nêkerd. Dima mi kênaya xo ra pers kerd û aye vat ke mamostayî a tacîz kerda. Dima keyeyî şîyî qereqolê Pîranî û ma sey keyeyan heta şanî îfade da. La semedo ke pedagog camêrd bi ê nêeşkayî ci rê çîyêk vajê. Eynî sinife ra gedeyêkê lajî dadîya xo ra qala serebûtî kerd. Coka dadîye gedeyê xo reyde şîya qereqolî. Dima ê şîyî dozgerîye la dozgerî goş nêdayo înan. Ma sey 6 welîyan şîyî hetê dozgerî la ey reyna goş nêda ma.

Ma pê zorî kerd ke dozger goş bido ma. Di gedeyanê lajan zî uca de îfade da û vateyê înan yewbînî tepiştêne. Avûkatî vat gereka cezaya 20 serran bêra dayene mamostayî û wezîfe ra bêro girewtene. No mamosta 8 serrî yo tîya de yo û wendekaranê verênan zî vat ke ey ê zî tacîz kerdê. Ma nêwazenê serê nê serebûtî bêro girewtene. Wa mamosta wezîfe ra bêro girewtene û ceza bigêro.''

Dadîya bîne L.C. zî pare kerd ke kênaya ci qala tacîzî aye rê kerda û tersî ra zaf bermaya. L.C. vat: ''Selahîyetdarî serebûtî mîyan kenê, gereka o mamosta roja verêne biameyêne eştene zîndanî. Vanê pedagog 20 rojî dima yeno û reyna domanî îfade danê. Ma 20 rojan çira vinderê? O mêrik ho teber de gêreno.'' 

Dadîye D.D. ard ziwan ke psîkolojîya kênaya ci xeripîyaya û nêwazena şora dibistane. D.D. vat: ''Selahîyetdarî ma peygoş kenê. Ma ney qebul nêkenê. Wa wezîfeyê xo bikerê. Faîl wa bêro tepiştene.''