Merkezê Xeberan - PAK-Swêdî 1-12-2019 Stockholm de Kitêbxaneyê Kurdî de semînerêk  tertip kerd. Semîner hetê cigêrayox û ronşvîr Murad Ciwanî ra  ame dayene, moderatorîya semînerî zî hetê Salim Çelikerî ra ame kerdene. Babeta semînerî "Çimeyê Vîrê netewî yê kurdan" bî. No seminer, semînero hîrêyîn bi ke hetê PAK-Swêdî ra ame amedekerdene.

Verê semînerî, ewilî Sereka Komîteya Îradekere ya PAK-Swêdî Seval Mert qisey kerd û seba ameyîşê înan sipas kerd. Semîner bi rêzgirewtişê seba şehîdanê Kurdistanî dest pêkerd.

Murad Ciwanî derga-derg behsê vîrê netewa Kurdistanî kerd. Qiseykerdişê xo de va : Heta nika her kes vîrê netewî bi Ahmedê Xanî dayêne dest pêkerdene. Goreyê mi babîyê vîrê netewî yê Kurdan Şerefxanê mîrê Bedlîsî yo. Şerefxan şahesera xo ya Şerefname de xarîteya welatê Kurdistanî tarîf keno, statuyek dano Kurdbîyayîşî. Ahmedê Xanî zî  behsê Kurdayetî keno.

Mûrad Ciwan qiseykerdişê xo de îddîa kerd ke Ahmedê Xanîyî eserê xo yê Mem û Zîne de programê partiyêka siyasî ya Kurdistanî pare kerdo. Rewşa kurdan, armanc, rayîr û şeklê xebate û armancê dewletbîyayîşî û yewitî kerdo.