Platformê Ziwanê Kurdkî (PZK) veng da pêrûna Kurdan ke wa wendegehan de semedê gedeyanê xo dersa ziwanê Kurdkî weçînê.

Platformî ewro Dîyarbekir de kombîyayîşê çapemenî kerd. Vervatoxê paltformî Şeşerfxan Cizirî beyanatê platfomî wend û wîna va:

Ziwanê Kurdkî Biweçînêne!

Abîyayîşê wendegehan ra badê pey wendegehan de demê dersanê weçînayîyan dest pêkerde. Nika wendekarî eşkenê dersanê  weçînitîyan biweçînê. No yew heq o û ganî Kurdî her tewir wayîrê ci vejîyê. Her çiqas armancê ma yo esasî perwerdeyê bi ziwanê dayîke bibo zî, ganî ziwanê meseleya ziwanî de dersa weçînitî, hetê pêrûna Kurdan ra sey gama verêne bêra vînayene. Dersa weçînitî semedê wendekaranê Kurdan yew îmkanêk a. Eke ma nê îmkano ke esto weş bixebitne, do sibaroj vernîya perwerdeyîya ziwanê dayîke bibo a.

Xebata semedê heqê perwerdeyê bi ziwanê Kurdkî bi serran o ke dewam kena. Heqê dersa weçînitî netîceyê ê xebatan ra yew o ke şarê Kurd bi kede û xebata xo dest visto. Tu kes heqanê şarê Kurd belaş nêdano înan. Goreyê tecrubeyanê serra verêne ma eşkere dîyo ke sazî û siyasetê dewlete meseleya dersa weçînitî de, dayîşê nê heqî de  astengîyan vejena. Dadî û babîyan na mesela de baş agahdar nêkenê. Sazîyê dewlete û siyaset pratîk de nêwazenê ke hûmara  wendekaranê dersa weçînitî zêde biba. Platforma Ziwanê Kurdkî veng dano dadî û babîyanê Kurd ke wa nê siyasetî pûç vejê. Ma eşkenî bi rehetî e-dewlet ser ra dersa weçînitî rê muracat bike. Ma emser muracatanê xo e-dewlet se ra bike, semedo ke muracat bin o qayde beno sey belgeyêka resmî kes nêeşkeno vîndî biko.

Eke muracatî zêde bibê semedê mamosteyanê Ziwanê Kurdkî zî lazimtîye virazîyena û eke wînî bo unîversîteyî zî neçar manenê ke goreyê na rastîye mamosteyanê Kurdkî perwerde bikê. Mamosteyê Kurdkî ke estê zî bi no qayde benê wayîrî gureyî. No zî semedê xurtkerdişê perwerdeyê bi Ziwanê Kurdkî qezencêko pîl o. na mesela de her çiqas zorî û zehmetî estbê zî, ganî dadî û babî wayîrê ziwanê Kurdkî vejîyê. Ziwanê xo biweçînê. Ma sey Platformê Ziwanê Kurdkî veng danê hem Kurdan  ke wa wendegehan de dersa ziwanê Kurdkî biweçînê. Çi Kurmanckî çi Zazakî  ganî tutê ma wendegehan de ziwanê xo weçînê.

Vengdayîşê ma heme partiyanê siyasî, saziyê sivîl, medya Kurdî, roşinvîr û hunermendan rê no yo; her kes hetê xo ra  wayîrê dersa ziwanê Kurdkî vejîyo. Onca bi îmkananê xo zî ziwanê xo bimusê. Ma pêro pîya semedê ziwanê Kurdkî xebate bike, pîya hereket bike, hişmendiya ziwanê Kurdî berz bike. Mîyanê Kurdan de wa nuştiş, wendiş û qisêkerdişê bi ziwanê Kurdkî bibo helwestêko xozayî, cimatkî û netewî. Wa her tim ziwanê Kurdkî bibo rengê Kurdan û nasnamê ey biddo teber.

Platformê Zimanê Kurdkî

13 01 2023

Amed