Merkezê Xeberan- Keyeyê Efe Taştekîno ke hetê polîsan ra bi wesayîtê zirxinî amebi kiştene sey sucdar ame vînayîş.

11 êlula 2019î de Efe Taştekîno 5 serre qezaya Baglarî ya Amedî de wexto ke waşt rayîrî ra şorê hetê bînî wesayîtê zirxinî yê polîsan da piro û wefat kerd.

Derheqê şoforê wesayîtê zirxinî de tehqîqato ke hetê Dozgerîya Komare ya Amedî ra amebi akerdene qedîya.

Derheqê polîsî de îddîanameyêk ame hadrekerdene. Gorê îdîanameyî kiştişê Taştekînî ''qeza'' yo. Gorê raporo ke hetê Mudirîyetê Trafîkî ra ame amadekerdene Efe Taştekîn o 5 serre seba ke wexto ke hetê rayîrê ra şîyêne hetê bînî seba ke bi hawayêkê balkêşî nêewnîya rayîrî ''sucdar'' o.

Polîsê vergumanî zî îdîa kerd ke ey wesayît lez nêramitêne û seba ke Taştekîn kilm bi ey doman nêdî û Taştekîn kewt binê wesayîtî. 

Gorê şahîdanê ke îfade da  seba ke wesayîto zirxin zaf lez amêne da sereyê Efe Taştekînî ro. Avûkatê Taştekînî derheqê babete de wina qisey kerd: "Serebûtê pirodayîşê wesayîtanê zirxinan zaf qewimîyenê. Kesê ke ehlê ramitişê nê wesayîtan nîyê xebitnenê. Eke qeza zî bikerê goş pa nêkewenê çunke zanenê ke do ceza nêgêrê."