Partîya Azadîya kurdistanî (PAK) û Partîya Sosyalîst a Kurdistanî (PSK) derheqê dewaya ke semedê qefilnayîşê partîyanê înan ameya akerdiş  Dîyarbekir de beyanatêk da çapemenî.

Her di partîyan îzah kerd ke, partîyê ke namê înan de Kurdistan esto, dewlet wazena ê partîyan biqefilno û waşt wa ti kes vera nê muameleyê dewlete de bêveng nêmano.

Seke zanîyeno dewlete wazena partîyê ke namê înan de Kurdistan vîyareno biqefilno û hetê dewlete ra seba Partîya Azadîya Kurdistanî (PAK) û Partîya Sosyalîst a Kurdistanî (PSK) dewaya qefilnayîşî ameya akerdene.PSK û PAK Dîyarbekir de derheqê dewaya qefilnayîşî ya ke seba înan ameya akerdiş beyanatêko ortax da çapemenî.

Namê PSK ser o Serekê Pêroyî yê Partîya Sosyalîst a Kurdistanî (PSK) Mesûd Tek, namê Partîya Azadîya Kurdistanî (PAK)  ser o zî Hetkarê Serekê Pêroyî yê PAKî Nurullah Tîmir qisê kerd.

Beyanatê her di partîyan de wina ame vatene “ Hetêk ra qezenc û qîmetanê Kurdan hetêk ra zî namê Kurdistan rê dişmenetîya dewlete dewam kena. Çarçeweya na dişmenetî de partîyanê ma rê seba ke namê partîyanê ma de kelîmeya Kurdistan esta dewa ameya akerdene. Bi nê dewayanê qefilnayîşî kenê ke derbe bidê azadî, xorêxistinkerdiş û xoîfadekerdiş. Tirkîya bi na kerdena xo hetê demokrasî û çareserkerdişê meseleya Kurd de ameya nuqteya otorîter û yesaxger. Dewayê ke derheqê ma de ameyê akerdiş hûqûqî ney, sîyasî yê.”

Beyanatê Partîya Azadîya Kurdistanî (PAK) û Partîya Sosyalîst a Kurdistanî (PSK) de ame waştiş ke, kesê ke aştîye, azadîye, demokrasî, hûqûq û çareserîya sîyasî wazenê gere vengê xo berz bikê û desteg bidê înan.