Dewa Otlubahçe ya qezaya Pulurî ya Dêrsimî de ocaxê madenî bi hawayêkê bêhuqûqî xebitîyeno. Dewijan ra Hidir Sayliyî vera ocaxî nêrazîbîyayîşê xo mojna û vat: ''Leşkerî herême ma rê qedexe kenê, madenan rê akenê.''

Şaristanê Dêrsimî yê Vakurê Kurdîstanî de her roje madenêko newe yeno akerdene. Warê Koyanê Munzurî yê bi 60 kîlomtereyan bi temamî sey 'warê madenî' ame îlankerdene.

Dewa Otlubahçe ya qezaya Pulurî ya Dêrsimî 1994 de hetê dewleta tirke ra amebî vengkerdene û dekewtişê dewe qedexe yo. La şîrketêka madenî dewe de rixmo ke destûrê ci çin o ocax akerd. Dewijan ra Hidir Sayliyî derheqê babete de PÎRHA rê qisey kerd û vera mesele nêrazîbîyayîşê xo mojna.

Sayliyî îfade kerd ke verî zî xîretê akerdişê madenî estbîyî la înan vera ci dewa akerdbî. Sayliyî da zanayene ke ocaxo nikayên bi hawayêkê îlegalî xebitîyeno û vat: ''Înan bê xebera dewijan makînayê sondajî, lûleyî û xeymî berdê. Dewa ma warê daristanan o. Mudirîya Daristanan senî destûr dana ney?

Leşkerî nêverdenê ma şorê dewe, vanê dewe 'herêma qedexe ya' la şîrketê madenî eşkenê destûr bigêrê, debikewê dewe. Ma siba hemwelatîyanê Dêrsimî û rêxistinanê xoza reyde şorê dewe. Ma dûştê pêro madenan ê. Ma venga pêro dezgehan danê ka wa ma têna meverdê, ma pîya nê têkoşînî bikerê.''