Şandeke kurdên Êzdî bi serperiştiya Mîrê Êzdîyan Mîr Hazim Tehsîn Beg û nûnerên Civata Ruhanî ya Êzdîyan, roja 01.09.2024ê seredana Rêzdar Serok Mesûd Barzanî kirin û çend daxwaziyên êzdîyan gîhandin cenabê wî.

Di demeke ku hinek kes û alîyên xêrnexwaz dixwazin peywendîyên kurdên misilman û kurdên êzdî têk bidin de, pêkhatina vê hevdîtinê gelekî girîng e.

Kurdistan ji kîjan nîjad û etnîsîte, dîn û mezhebê be, welatê hemû kurd û kurdistanîyan e.

Li ser esasê wekhevî, edalet, azadî, hevrêzî û demokrasîyê, parastin û pêkanîna pêkvejîyana hemû pêkhateyên etnîkî, dînî, mezhebî û civakî, divê wazîfeya sereke ya hemû kurd û kurdistanîyekî welatperwer be.

Bi vê hişmendî û nêrînê, em hêvî û bawer dikin ku hevdîtina Rêzdar Serok Mesûd Barzanî ya li gel şanda êzdîyan, di çareserkirin û pêçandina pirsgirêk û birînên kurdên êzdî de û di parastin û geş kirina kultura pêkvejînê de dê roleke dîrokî bilihîze.

02.09.2024

Buroya Ragehandinê ya Partîya Welatparêzên Kurdistanê (PWK)