Buroya Çapemenî ya Partîya Welatparêzanê Kurdîstanî (PWK):

Şorişê Îlone çar parçeyanê Kurdîstanî û dinya de newe ra adirê xohesîyayîşê kurdayetî wekerd

11ê îlona 1961î de serekîya Mele Mustafa Barzanî yê nemir û pêşkeşîya Partîya Demokrat a Kurdistanî de şarê ma yê Başûrê Kurdistanî verba Dewleta Iraqî semedê azadî û xelasîya xoya neteweyî reyna serewedarit.

Seke yeno zanayîş wexto ke xoverrodayîşê Dêrsimî bi jenosîdêko pîl qedîya û Komara Kurdistanî (Komara Kurdîstanî ya Mehabadî) amey rijnayîş ra pey hereketê milî yê Kurdîstanî de yew şikteyo demderg virazîya; wextêko derg hewrê sîyayî, bêvengî û û bêhîvîtî xo verda serê asmênê çar perçeyanê Kurdistanî

Na bêvengîye heta 1958 dewam kerd. La badê surgunêko 11 serrî dewam kerd ra pey, 1958 de Mele Mustafa Barzanî û embazê xo Yewîya Sowyetan ra agêray Îraq, Kurdîstanê Başûrî de demêko newe destpêkerd. No demo newede miletê kurdî seke hewn ra haya bibo hişmendîya neteweyî, azadî û xelasîya milî xurt bî. Hewrê sîyayî asmênê Kurdistanî ra vila bî; hêvî û û bawerîya neteweyî reyna çar perçeyanê Kurdistanî de xurt bî. La Şorişê îlone sey pêl û firtoneyêko xurt seraserê Kurdîstanî de tesîrêko zaf pîl kerd.

Şorişê îlone eslê xo de şorişê çar perçeyanê Kurdistanî û şorişê miletê kurdî bi. Çunkî, Şorişê Îlone çar perçeyanê Kurdistanî û dinya de mîyanî kurdan de newe ra adirê xohesîyayîşê kurdayetî wekerd. Bi nê rolê xo yê tarîxî Şorişê Îlone seraser çar parçe Kurdîstan de Şorişê miletê kurdî bi.

Şorişê Îlone 9 serrî dewam kerd. Netîceyê xoverrodayîşê şarê ma yê qehremananî Dewleta Iraqî peyser gam eşt û mecbur mendi ke sereko nemir Mele Mustafa Barzanî û PDK reyde ronişo. Roja 11.03.1970 de Partîya Demokrat a Kurdistanî û dewleta Iraqî (rejîmê baasî) pêamey û Peymana Otonomî îmza kerdi. Bi na peymane heqê şarê Kurdistanê Başûrî yê milî, siyasî, îdarî, ekonomîk û kulturî amey naskerdiş û sîstemê otonomî amey awankerdiş.

La yew demeyo kilm ra pey Rejîmê Baasî yê Iraqî hukmê Peymana Otonomî ca nêardî û Peymana Otonomî îptal kerd. Miletê kurdî na qebul nêkerd, serekîya serokê nemir Mela Mustafa Barzanî û pêşkeşîya Partîya Demokrat a Kurdîstanî (PDK) de semedê azadî û xelasîya neteweyî mecbu mend reyna sere wedart.

Ma serrgêra Şorişê Îlone ya 63ine de bi hişmendî û bawerîya neteweyî û Kurdîstanî, Şorişê Îlone sey şorişê heme miletê kurdî vînenê, sere de serekê neteweyî Mele Mustafa Barzanî yê qehremanî û heme şehîd, xazî û kedkaranê Şorişê îlone bi rêz û hurmet yad kenê.

11.09.2024

Buroya Çapemenî ya Partîya Welatparêzanê Kurdîstanî (PWK)