15ê Gulane Roja Ziwanê Kurdkî Bakurê Kurdistanî de bi çalakîyanê cîya-cîyayan ame pîrozkerdene.
Endamê Platformê Ziwanê Kurdkî Dîyarbekir de kom bîy, bayanat day çapemenî û dewleta Tirkîya ra waşt wa bi ziwanê Kurdkî mekteban de dersa Kurdkî bêra dayane. Endamê platformî wazenê wa dewlete dezgeyêkê Kurdkî zî akero.
Endama Platformî û îdarekera DBP Devrîm Malgaz Uzunca îzah kerd ke, tayn mendo ke domanê Kurdan ziwanê xo vindî bikê û va “ Her çî ra ver gere semedê qijanê 3-5- serrîyan krêşê Kurdkî bêrê akerdene.
Bakurê Kurdistanî de ziwanê Kurdî resmî nîyo û mekteban de derse bi ziwanê Tirkî yena dayene. Dersa Kurdkî serra 2012 ra nat tena sey dersa weçînaye yena dayene. Heto bîn ra tayn mektebanê taybetan de Kurdkî derse yena dayene.
Hereketa Azadî zî mîyanê Platformê ziwanê Kurdkî de ca gêna. Verfekê Hereketa Azadî Ayetullah Aştî îzah kerd ke nika mumkun nîyo ke dewlete rayîrê ziwanê Kurdkî bi hawayo resmî akero û wina va “Gere her çî ra ver Kurdî wayîrê ziwanê xo vejîyê û dewlete ra heqê xo yê perwerdeyî biwazê”
Endamê Platformê Ziwanê Kurdkî vanê “Ma do dewlete dir zî tayn pêvînayîşan bike û heqê perwerdeyîya kurdkî dewlete ra biwazê”