Şêwirmendê Ewlehiya Neteweyî ya Îraqê ragihand ku Ehmed Şer berê endamê DAIŞ û El Qaîdeyê bûye û “destê wî bi xwîna Îraqiyan sor e.”

Şêwirmendê Ewlehiya Neteweyî ya Îraqê Qasim Erecî doh di hevpeyvînekê bi medyayeke Îraqî re de ragihand:

“Ehmed Şer hatibû desteserkirin, ew endamê DAIŞ û El Qaîdeyê bû.

Destê wî bi xwîna Îraqiyan sor e, ew tiştê ku dibêjin Xwedê ji sûcên berê dibore jî li cem me nîne.”

Nivîsgeha Ragihandinê ya Wezareta Karên Derve ya Îraqê 21ê Sibatê ragihand:

“Me bi awayê fermî dawetnameyek ji Wezîrê Karên Derve yê Sûriyeyê Esed Şeybanî re şandiye ku were serdana Îraqê.

Ev jî bi armanca nîqaşkirina çend dosyeyên hevbeş û vekirina rûpeleke nû ya di pêwendiyên her du welatan de ye lê dema serdanê nehatiye diyarkirin.”

Şêwirmendê Ewlehiya Neteweyî ya Îraqê Qasim Erecî got:

“Dawetname ji Wezîrê Karên Derve yê Sûriyeyê Esed Şeybanî re hatiye şandin lê li ser daxwaza wî ew serdan hat bipaşxistin.”

Qasim Erecî behsa hebûna hêzên Tirkiyeyê li axa Îraq û Herêma Kurdistanê jî kir û anî ziman:

“100 baregehên Tirkiye li axa Îraqê hene lê ti biryar an hevahengiyên Îraqî nînin ku rê bide hebûna hêzên Tirkiyeyê.

Hêzên Tirkiyeyê ji sala 1995an ve li axa Îraqê, li Herêma Kurdistanê ne û ev ne tiştekî nû ye.

Hebûna wan hêzan bi hinceta PKKyê ye lê ne bi rizamendî û hevahengiya Bexdayê ye.”

“Em PKKyê teşwîq dikin”

Qasim Erecî li ser peyama Abdullah Ocalan jî anî ziman:

“Ew peyama ku Abdullah Ocalan belav kir, em wekî Hikûmeta Îraqê bi germî pêşwazî dikin, piştgiriyê didin danîna çekan û belavbûnê.

Em PKKyê teşwîq dikin ku biryara birêz Ocalan bi cih bîne, wê demê Tirkiye dê hêzên xwe bibe wî aliyê sînor.

Eger PKK belav bibe, em dê hingê bi Tirkiyeyê re li ser pêvajoya vekişîna wan a ji sînoran guftûgoyê bikin.”

Şêwirmendê Ewlehiya Neteweyî ya Îraqê rewşa ewlehî ya Îraqê wekî aram pênase kir û dengoyên derbarê îhtimala darbeyeke leşkerî dûr dibîne û got:

“Bi hebûna Heşda Şebiyê kudeta çênabe.”

Qasim Erecî her wiha anî ziman:

“Ez Heşdî û Bedrî me û pê serbilind im.

Ji sala 2014an ve ez endamê Heşd û Bedrê me lê niha ti çalakiyên min bi wan re nînin.”