Qezaya Qisle ya Dêrsimî de qaymeqam Ugur Tutkanî serek û îdarekarê Cemxaneyê Duzgun Babayî tehdît kerdî. Tutkanî vat:  ''Şima do hêzê dewlete bivînê.''

Serekê Cemxaneyê Duzgun Babayî yê Qisleya Dêrsimî Sînan Kirmiziçîçekî  vizêr bi eşkerayîya nuştekîye dabi eşnawitene ke hîrê serranê peyênan de Cemxaneyê înan rê bîllasebeb 60 hezar cezaya pereyî ameya birnayene û nê sey bêhuqûqîye name kerdbi. Bado ke çapemenîye de xebere vila bîye Qaymeqamê Qisle Ugur Tutkan pîya bi hêzanê leşkerî şi Cemxane, fotografê ke destê înan de tifingî estê medyaya sanale de pare kerd û Kirmiziçîçek tehdît kerd.

Tutkanî îdîaka kerd ke binê nameyê komele de pere yeno arêdayene û teberê Cemxaneyî de yeno xerckerdene û vat: ''Komara Tirkîya dewleta qanûn û huqûqî ya. Ma do huqûq û hêzê dewletê bimejnê to û êyê ke sey to yê.''

Kirmiziçîçekî ke ajansa MA rê qisey kerd vera tehtîdanê qaymeqam Tutkanî nêrazîbîyayîş mojna û vat: ''Ameyî verê Cemxaneyî  de pê tifigan poz dayî û ma tehdît kerdî. Pê îftîrayan wazenê nameyê Cemxaneyê ma leymin bikerê. Eke destê înan de kanitêk esto wa bêrê ma verê huqûqî yewbînan ra hesab bipersê. Ma çîyêko xelet nêkerdo, sereyê berz o. Pê tifing û tehdîtan ti hêzê dewlete mojnenê ra.''