Merkezê Xeberan- 6ê kanûne de Hemşaredarê Bêgirî ya Wanî Leyla Balkan û Yilmaz Şalan wezîfe ra ameyî girewtene û herinda înan de Erkan Savar sey qeyûm ame tayînkerdene. Karo verên ê Savarî padayîşê Keyeyê Meymanan û Kitaban ê Ayşe Şan bi ke hetê cinîyan ra amebi awankerdene.

Hetkara Hemşaredaranê Bêgirî û Hetkara Serekê Pêroyî ya Partîya Azadîye û Merdimî Menîce Rumeysa Gulmez derheqê babete de vat: "Qeyûm armanc keno ke xebata ma nêra ecibnayene. Na rewşêka sîstematîk a. Wazeno ke pêro xebatanê ma pakî bikero."

Gulmeze îfade kerd ke Keyeyê Meymanan û Kitaban ê Ayşe Şan bi rayanê zafînan ê Meclîsê Şaredarîye ame awankerdene û qeymeqamo ke nika qeyûmê Şaredarîya Bêgirî yo seba keyeyî destûr dabi ci.

Hemşaredare Leyla Balkana ke wezîfeyê ci ame xespkerdene ard ziwan ke qeyûm bêsedemêk Keyeyê Meymanan û Kitaban ê Ayşe Şan padayo.

Hunermend Şerko Kanîwarî zî eşkera kerd ke qeyûmî wazenê kulturê kurdan çin bikerê û vat: "Ayşe Şan kulturê kurdan dana ciwîyayene. Kerdişê qeyûmî bêtehamûlîya vera kurdan û kulturê kurdan o."

Kamîwarî teda, asteng û qedexe yê ke serranê 90an de vera kurdan ameyî kerdene vistî vîrî û vat: "Nika rewşe rewşa ê serran ra wetêr a. Nika bi hawayêkê eşkera tabelayan anê war. Na polîtîkaya tersnayîş a la ê do ser nêkewê. Ê çend tabelayan zî bîyarê war, xebatan zî vindarnê; şarê kurdî û domanê kurdî do wayîrê kultur, ziwan û hunerê xo bivejîyê."