Wezîrê Navxwe yê Herêma Kurdistanê radigehîne, “Herêma Kurdistanê pabendî rûbirûbûna tawanên rêkxistî û torên bazirganîkirina bi mirovan e.”

Wezîrê Navxwe yê Hikûmeta Herêma Kurdistanê Rêber Ehmed îro (Pêncşem, 03ê Nîsana 2025ê) li ser tora civakî ya Xê ragehand, “Min di Lûtkeya Ewlehiya Sinoran de li Londonê pabendiya Hikûmeta Herêma Kurdistanê bi rûbirûbûna tawanên rêkxistî û torên bazirganîkirina bi mirovan ji bo welatên ku tevlî wê lûtkeyê bûbûn tekez kir.”

Wezîrê Navxwe yê Hikûmeta Herêma Kurdistanê herwesa got, “Em bi hevparên xwe yên navdewletî re ji bo rûbirûbûna tawanên sinorbir kar dikin.”

Rêber Ehmed amaje jî da ku, di dema du rojên Lûtkeya Ewlehiya Sinoran de derfeta wê yekê hebû ku, bi gelek hevkûfên xwe yên ji welatên Ewropayê re bicive û behsa xurtkirina peywendiyan û hevahengiya navbera Hikûmeta Herêma Kurdistanê û welatan û bihêzkirina ewlehiya sinoran bike.

Navbirî ji bo kêmkirina derfetên tawanan ji bo qaçaxçîtiya koçberan û komên tawanên rêkxistî behsa çend pêngavan kir û ragehand, “Bizavên me ji bo serederîkirinê ji bo vedîtina çareseriyê ji arêşeyên aborî re berdewam in, ji bo ku em hêviyê bidin ciwanên xwe û rêyê nedin ku ji aliyê torên tawanan ve yarî bi çarenivîsa wan bê kirin.”

Wezîrê Navxwe yê Hikûmeta Herêma Kurdistanê amaje jî da, “Pirçavkanîkirin û hemerengkirina aborî yek ji karên pêşiyê yên Serokwezîr Mesrûr Barzanî ye. Herwesa Hikûmeta Herêma Kurdistanê jî ji nêz ve hevahengiyê bi nivîsîngehên geştyarî re dike, ji bo ku rêyê li serederî û çalakiyên neqanûnî yên geştkirinê bigire.”

Lûtkeya Ewlehiya Sinoran li roja Duşemê, 31.03.2025, bi awayekî fermî dest bi karên xwe kir û du rojan berdewam bû, wezîrên navxwe û dadê û berpirsên ewlehiya sinoran ên hejmareke zêde ya welatan jî tevlî wê lûtkeyê bûn.

Wezîrê Navxwe yê Herêma Kurdistanê Rêber Ehmed jî, bi hevaltiya hejmareke berpirsên hikûmetê, li ser nameya vexwandinê ya fermî ya Wezareta Navxwe ya Hikûmeta Brîtanyayê tevlî wê lûtkeyê bû.