Seyîdxan Kurij - Koblenz

Resamo kurd Mehmûd Celayir 11.10.2024 `de bajarê Almanya Koblenz` de bi nameyî “Menzerê Hewnî û Menzereyê Kabûsî” pa 14 resamana yew nawitgeh akerd. Se ke nameyê nawitgeh ra zî dîyar beno, no nawitgeh de hîna zaf resimê ke menzere nîṣan danê, temaya menzerê sero ameyê viraṣtiṣ, ameyê nîṣan dayen. No nawitgeh de xêrcê resimanî Mehmûdî resimê 13 resamanî bînan zî ameyê nîşan dayen.

Nawitgehê “Menzerê Hewnî û Menzereyê Kabûsî” Muzeyê Mittelrhein yê Koblenz (Mittelrhein Museum Koblenz) de virazîyayî. No muze na mintiqa de yew muzeyo zaf muhîm o. Nawitgeh yewindesî na aṣme de, ṣand saet 19.00 de bi muzîk destcikerd. Cuwa pey serekê muzeyî qiseykerd. Serekê muzeyî derheqê amacê nawitgehî de û resiman de agahdarî da beṣdaran. Serekê muzeyî qiseykerdiṣê xo ra pey heme hunermedî tek û tek dayî nas kerden.

Mehmûd Celayîrî semedê no namitgeha Îstanbul ra ame û ma pîya ṣîye Koblenz. Serekê muzeyî taybetî Mehmûd rê spas kerd ke o semedê no namitgeha Îstanbul ra ameyo tîya.   

Tîya de di 3 resmê Mehmûd Celayîrî ke tebîetî Kurdîstanî anî çimanî vero ameyî dard kerden. Mîyanê heme resiman de resimanê Mehmudî zaf alaqayê beṣdaran ant. Zafê beṣdarî ameyê Mehmûd het, derheqê resiman de ey rey de sohbet kerd. Resimê Mehmûdî koloksîyonerê ey dayibî muze. Helbet nê resimî namitgeh ra pey reyna dîyenê wayîrê înan.

No pêşengehê ““Menzerê Hewnî û Menzereyê Kabûsî” beyntarê 12 teşrîna verêne 2024 – 09 Adarê 2025 de akerde yo.

Mehmûd Celayîr 1950 de Çewlîg de ameyo dinya û 1972 de Îstanbul de akademîyî hunerî qedênayo. Heta nika Tirkîya, Almanya, Fransa û Îtalya de xeylêk pêşangehî şexsî û grûbî akerdî û çend zî xelatî girotî. 1986 ra nat 20 serrî ra zêdeyêr Almanya de bajarî Stuttgartî de ciwîya. Nika Îstanbul de ciwîyeno û xebatê xo ya hunerî domneno.

Cayî Pêşangehî:

Mittelrhein Museum Koblenz

Zentralplatz 1

56068 Koblenz