Navenda Nûçeyan

Piştî bangewazîya Rêveberîya Xweser a ji bo dadgehîkirina çekdarên DAIŞê û danîna mekanîzmekê ji bo cezakirina wan çekdaran, wê rêveberîyê dest bi darizandina çekdarên DAIŞê yên ku hemwelatîyên Sûrîyê ne, kirîye.

Li gorî zanyarîyên ku hatine belavkirin, ji nava 10 hezar çekdarên DAIŞê ku di destê Rêveberîya Xweser de girtî ne, 6 hezar ji wan hemwelatîyên Sûrîyê ne û heta niha jî 1,724 çekdar hatine dadgehîkirin û di derbarê wan de Dadgeha Parastina Gel a Rêveberîya Xweser biryar derxistine.

Ji bo darizandina çekdarên DAIŞê yên biyanî jî, komîteyek ji alîyê Encûmena Giştî ya Dada Civakî ya Bakur û Rojhilatê Sûrîyê ve hatîye avakirin, da ku li gel welatên peywendîdar mekanîzmekê ji bo darizandina wan çekdaran destnîşan bikin.

Herwiha Rêveberîya Xweser dixwaze çekdarên biyanî jî li herêmên Bakur û Rojhilatê Sûrîyê bêne darizandin, lê heta niha ti bersivek ji bo wê daxwazîyê nehatîye dayîn.