Rêveberiya Xweser li ser Kongreya Diyaloga Niştimanî ya Sûriyeyê got, “Kongre nûnertiya gelê Sûriyeyê nake.”

Kongreya Diyaloga Niştimanî ya Sûriyeyê doh li Şamê dest pê kir û 2 rojan berdewam kir.

Rêveberiya Xweser li ser civîna Kongreya Diyaloga Niştimanî ya Sûriyeyê ya li Şamê daxuyaniyeke berfireh belav kir.

Rêveberiya Xweser di daxuyaniya xwe de got:

“Ji dema hilweşandina rejîma Beasê li Sûriyeyê, gelê Sûriyeyê bi hemû pêkhateyên xwe li hêviya avakirina Sûriyeke yekgirtî ji bo hemû gelê Sûriyeyê ye, bêyî dûrxistin û paşguhkirinê.

Dibe ku Kongreya Niştimanî yek ji xwestekên gelê Sûriyeyê bû ku bigihêje armancên şoreşa xwe ku zêdetirî 14 salan di ser re derbas bû û ji destpêka hilweşandina rejîma berê hemû gelên Sûriyeyê nîqaş dikin û li hêviya Kongreya Niştîmanî ya Sûriyeyê û gavên pratîkî ji bo avakirina Sûriyeyê ne.

Lê ev gavên ku rêveberiya demkî li Sûriyeyê di mijara diyalog û beşdariyê de avêtin ne li gorî hêviyan bû. Ji destpêkê ve diviyabû ku komîteyeke yekgirtî were avakirin ji bo amadekirina vê diyalogê û paşê kesên ku dê beşdar bibin werin nîqaşkirin.

Piştî wê jî Kongreya Diyaloga Niştimanî ya berfireh were lidarxistin lê her tiştê ku diqewime dûrî xwestekên gelê Sûriyeyê bû.”

“Nûnertiya pêkhateyên Sûriyeyê nake”

Rêveberiya Xweser her wiha da zanîn:

“Komîteya ku ji bo amadekirina kongreyê hatiye avakirin nûnertiya pêkhateyên gelê Sûriyeyê nake û daxuyaniyên wan jî dûrî zimanê diyalogê û lihevkirina nêrînan bû.

Ji ber vê yekê li hinek parêzgehên Sûriyeyê rêzecivîn di bin navê amadekirina diyaloga niştîmanî, hatin lidarxistin.

Lê ev civîn tenê siyasetên ku gelê Sûriyeyê ji bo tunekirina wan têkoşiya, nîşan dide. Îro û piştî wan civînên ku nûnerên rast ên gel beşdar nebûbûn diyar bû ku ew nêzîkî dûrxistin, paşguhkirin û nehesibandina mozayîka gelê Sûriyeyê bûn li Şamê kongreyeke bi navê diyaloga niştimanî tê lidarxistin.

Em di Rêveberiya Xweser a Demokratîk a Herêma Bakur û Rojhilatê Sûriyeyê de ku me ji gelê Sûriyeyê re teqez kir û dikin ku dikarin birînên xwe derman bikin, Sûriyeke demokratîk pirreng bi rêya diyaloga niştimanî ya rast di navbera pêkhate û neteweyên gelê Sûriyeyê de, ava bike.

Em dibêjin ku ev kongre nûnertiya gelê Sûriyeyê nake. Em beşek ji Sûriyeyê ne û nûnertiya me nake û ji naveroka vê kongreyê ne razî ne û em dê nebin beşek ji pêkanîna encamên wê.”

“Em dê xebatên xwe bidomînin”

Rêveberiyê behsa armancên xwe kir û anî ziman:

“Em careke din dibêjin ku em wekî gelê Sûriyeyê armanca me ya yekem û dawîn ji destpêka Şoreşa Sûriyeyê ku civaka Sûriyeyê ji zilm, dijminahî, siyasetên dûrxistin û paşguhkirinê rizgar bikin û însiyatîfên me yên girîng di vê çarçoveyê de hebûn.

Em îro jî xwestekên xwe ji bo lidarxistina kongreyeke rast ku nûnertiya hemû gelê Sûriyeyê bike, tu kesî dûr naxe û paşguh nake, nû dikin.

Em bangî gelê xwe yê Sûriyeyê dikin ku em dê xebatên xwe ji bo pêkanîna armancên şoreşa xwe bidomînin da ku em layiqê berdêlên ku me dane û hêvî û xwestekên gelê xwe pêk bînin.”

Berdevkê Komîteya Amadekar a Kongreya Niştimanî ya Sûriyeyê Hesen Dixêm ragihandibû Kurd dê wekî kes bi navê xwe lê ne wekî şandeyekê beşdarî kongreyê bibin.

Li gorî agahiyên ku Komîteya Amadekar a Kongreyê dane Rûdawê, derdora 400 heta 600 kesî dê beşdarî kongreyê bibin.

Li hêla din, Komîteya Amadekar a Kongreya Diyaloga Niştimanî ya Sûriyeyê beyî hebûna Kurdan hat avakirin.

Komîte 11ê Sibata 2025an bi biryara Serokkomarê Sûriyeyê Ehmed Şer hat avakirin, ev komîte ji 7 kesan pêk tê lê di nav wan de Kurdek jî nîne.

Rûdaw