Konê Reş

Kes weke min

Sikak û kolanên

Bajarê min nas nakî;

Ez dizanim

Kîjan meyxane li kû ye

Kîjan çayxane li kû ye û

Kîjan bazarxane li kû ye..

Tariye..

Tariyê bi ronahiyê

Naguherînim

Ez kiryarê ronahiyê me

* * *

Raweste rêwiyo!

Ev bajarê min e

Tu weke min, bajarê min

Nas nakî..

Ev ne cirîda te ye

Ev cirîda min e

Ez ji te bêtir

Bajarê xwe û

Welatiyên xwe nas dikim 

Dizanim ji kîjan malê

Çend koçber û derbiderî

Li bajarên dinyayê bûne.. 

Li wan:

Kolanan dimalin

Solan boya dikin 

Avaniya ava dikin..

* * *

Raweste Rêwiyo!

Tu weke min

Ciwan, Sîpan û Hozan

Nas nakî 

Evên ku

Çixareyan di sikak û

kolanan de difroşin

Ez û wan ji taxekê ne..

Tu weke min

Miho, Hiso û Hemo

Nas nakî

Evên ku

Bilêtên bext û şensî

Li ber dîwaran difroşin

Ew, kurmam û kurxalên min in

Erê rêwiyo, tu weke min

Welatiyên min û

Bajarê min nas nakî..

De hela xwe bide alî ku 

di welatê xwe de 

bi azadî bijîn, 

bi zimanê dê û bavên xwe

xeber bidin û

di avakirina û pêşketina 

welatê xwe de kar û 

xebatê bikin..

Konê Reş/ Min bi vê helbesta xwe (Rêwiyo!), beşdarî di maratona helbestan ya PEN International (PEN International Marathon in Poem/ 2025) kiriye

Syriya/ Qamişlo 8.2.2025