Mûmê Welat ku birayê Mihemed Şêx Birîmce ye ji K24ê re ragihand, Mihemed Şêx Birîmce ji ber pêketina bi vîrûsa Koronayê rewşa wî têk çûbû, îro li nexweşxaneyeke Semsûrê koça dawiyê kir.

Diyar kir jî, îro termê wî li goristina Osman Sebrî li gundê kolkê yê semsûr bi xakê hat spartin.

Mihemed Şêx Birîmce di heman demê de ku zaveyê xebatkarê Kurd Osman Sebrî bû, di sala 1955an li Efrînê jidayik bû, ji salên heftê yên sedsala bûrî ve di nav tevgera siyasî ya Kurdî de xebat dikir.

Mihemed Şêx Birîmce demeke dirêj li Şamê mabû, piştî despêkirina krîza Sûriyê koçî bakurê Kurdistanê bû û li gundê Kolkê yê Semsûrê bicih bûbû.

Siyasetmedar, nivîskar û zimanzan Mihemed Şêx Birîmce bi dehan helbest û gotar li pêgehên cuda belav kiribûn û yek ji damezrênerê Saziya Fêrkirin û Parastina Zimanê Kurdî di sala 2006an de bû.