Rêxistina Mafên Mirov a Efrîn-Sûriyê ragihand ku, artêşa Tirkiyê dibistanên Efrînê veguherandine navendên komkirina çekdarên Sûriyê ji bo veguhastina wan bo Lîbya û Azerbaycanê.

Berdevkê Rêxistina Mafên Mirov a Efrîn-Sûriyê Îbrahîm Şêxo, ragihand ku, artêşa Tirkiyê dibistanên Efrînê veguherandine navendên komkirin û perwerdekirina çekdarên Sûriyê da ku wan ji bo şer veguhêze Lîbya û Azerbaycanê.

Şêxo dazanîn ku, dibistana Emîr Gabarî ya amedeyî û dibistana Ezhar Efrîn yên li navenda bajarê Efrînê ku her dû niha weke navendên Îstîxbarata Tirkiyê MÎT ne, bûne navendên navendên komkirin û perwerdekirina çekdarên Sûriyê da ku wan ji bo şer veguhezîne Lîbaya û Ezerbêcanê.

Şêxo herwiha diyar kir ku, li gor agahiyên ku wan ji çavkaniyên xwe yên taybet wergirtine, ji çekdarên grûpa Cebhet Elşamiyê nêzîkî 370 çekdar di şerê di navbera Azerbaycan û Ermenistanê de hatine kuştin.

Herêma Efrînê ya Rojavayê Kurdistanê 18ê Adara 2018an di encama êrişeke berfireh de ketibû destê leşkerên Tirkiyê û grûpên çekdar ên ser bi wî welatî ve.

Aloziyên navbera Ermenistan û Azerbaycanê ku ji meha Tîrmeha îsal ve ber bi zêdebûnê ve çûn, bi şerê ku roja Yekşemê 27ê Îlona 2020ê li herêma Nagorno-Karabaxê destpê kir, gehiştin lutkeyê.

Bi destpêkirina şerê Azerbaycan û Ermenistanê li Qerebaxê, Tirkiye bi şandina çekdarên Sûrî bo piştevaniya Azerbaycanê hat tohmetbarkirin.

Serokomarê Recep Tayyîp Erdogan duh di gotarekê de behsa wî şerî kiribû û gotibû ew dê bi hemû şiyan û derfetên xwe piştevaniya Azerbaycanê bikin.

Herwiha Serokomarê Fransayê Emmanuel Macron berî du rojan ragihandibû ku zanyariyên piştrastkirî di destê wan de hene ku komên cîhadî ji Sûriyê çûne parêzgeha Dîlok a Bakurê Kurdistanê û ji wê derê jî bo herêma Qerebaxê hatine veguhestin.