Rêxistinê meslekî û kede yê weşîye vatî ke şer problemêko weşîye yê şarî yo û vengê aştîye kerdî.

Yewîya Tabîbanê Tirkî (TTB), Yewîya Diransazê Tirkî (TDB), Sendîkaya Kedkaranê Xizmetê Sosyal û Weşîye (SES), Sendîkaya Kedkaranê Weşîye yê Şorişger (Dev-Tenduristî-Îş), Komeleya Hemşîreyê Tirkî (THD), Komeleya Psîkologanê Tirkî (TPD), Komeleya Heme Teknîsyenê Radyolojî û Komeleya Kedkaranê Sosyalî derheqê şerê Ukrayna û Rusya de eşkerayîyêka nuştekî dayî.

Rêxistinan eşkerayîya xo de dayî zanayene ke heme dinya bedêla bêberpirsîyarîya lîderan dana û wina vatî: “Şer problemêko weşîye yê şarî yo. Goreyê Pêkerdişê Cenevre û Prensîbanê Mîyanneteweyî, ganî bêhetbîyayîşê tibbî nêro peygoşkerdiş. Goreyê heqê merdiman ganî heme meslekanê weşîye rê hurmet bêro nîşandayîş.  Wezîfeyê ma pêro komanê meslekî, ked û weşîye pawitişê weşîya komelî û têkoşînê vera lêşinkerdişê dormeyî yo. Ma vanê ke, ma paştîdayîşê heme şar û meslektaşanê xo yê ke bîyî mexdurê no şerî kenê û veng danê heme hetan ke bi hawayêko lez şer bidî vindarnayîş.”