11 reyî venga dayîke Emîne Şenyaşar dîya ke îfade bida. Emîne Şenyaşar bi persê ''Kamî mêrde û di lajê mi kişto?'' cewab da persanê dozgerî.

Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 288 rojî yo verê Edlîyeya Riha de nobeta edaletî gêna.

Wextê nobete de polîsî ameyî hetê keyeyî û înan waşt ke seba ke ''heqaretê wezîfedaranê umûmîye kerdo'' Emîne Şenyaşar şora îfade bida. Reya 11 a ke venga dîyeno Emîne Şenyaşar dîya ke îfade bida.

Eşkera bi ke vateyê ke roja 241. û roja 245. ya nobete de Emîne Şenyaşar  vato sey heqaretî hesibîyayî.

Ferît Şenyaşarî vera nê kerdişî tewirê xo mojna û vat: '' Wa ê cewabê 'Kamî mêrde û di lajê mi kişto?' bidê.  Emîne û Ferît Şenyaşar seba îfadeyî avûkatanê xo reyde derbazê bînaya edlîye bîyî.

Keyeyê Şenyaşarî hesabê xo yê twitterî ser de Walîyê Riha Abdullah Erîn, Wezîrê Edaletî Abdulhamît Gul, Serekê Yewîya Baroyanê Tirkîya (TBB) Erînç Sagkan û Wekîlê AKPyî yê Riha Ahmet Eşref Fakîbaba etîket kerdî û vat: ''Ma herinda ke keyeyê xo de ronişê verê Edlîyeya Riha de ronişenê. Wa no zî şermê huqûq û edaletê Tirkîya bo.''