Merkezê Xeberan- Qirkerdişê Roboskî ra ke 19ê înan domanî 34 kesî hetê bombardûmanê teyarayanê şerî ra ameybî qetilkerdene 8 serrî vîyartî la sucdarî nêameyî dîyene û hukmkerdene. Her çiqas keyeyan ser o tedaya girane esta zî waştişo hempar reyna edalet o.

8 serrî verê cû 28ê kanûna 2011î de teyarayanê şerî yê F-16î yê ke giredayeyê TSKyî bîyî dewa Roboskî ya qezaya Qilebanî ya Şirnexî ser o bambayî varnabi û 19ê ci domanî 34 hemwelatîyî qir kerdî. 8 serrî vîyartî la hema zî sucdarî nêameyî dîyene û hukmkerdene. Herinda ke sucdarî bêrê dîyenê kesê kê waştêne dewa roşnî bikê û vengê xo berz bikê ameyî astengkerdene. Kesê ke kewenê dewa dima yenê destbendkerdene û derheqê ci de dosyaya tehqîqatî yena akerdene.

Bedenê Qijkekî Lete Lete Kerdî

28ê kanûna 20113i de bêvengîya şewe bi vengê bombayan qûle bîye. 19ê înan domanî 34 kesê ke serran ra nata bazairganîya sînorî kerdêne û a şewe zî Herêma Federale ya Başûrê Kurdîstanî ra agêrayêne dewa xo hetê teyarayanê şerî yê F-16î ra ameyî qetilkerene. Wexto ke Qirkerdişê Roboskî ame kerdene dewijî şîyî cayê qirkerdişî. Servet Encuyo ke qirkerdiş ra xelisîya xebere daye dewijanê xo.

Wexto ke qirkerdiş ame kerdene û bedenê qijkekî bîyî lete lete dinya vera nê serebûtî bîye ker, lal û kor. Medayay îqtîdarî waşt ke serê serebûtî pade. Labelê çapemenîya kurdî qirkerdiş da zanayene. Nê 8 serran de muracatê keyeyan ê seba edaletî hetê Mehkemeya Tirkîya, Leşkerî û Ewropa ra her tim ame redkerdene. Derheqê dosya de tim bira bêtaqîbîye ameye dayene. Têkoşînê edaletî yê keyeyan 8 serran ra nata bêmabên dewam keno. Keyeyî 8 serr ê ke bi waştişê ''Seba Roboskî û edaletî wa sucdarî bêrê hukmkerdene'' şinê goranê domananê xo ser û wazenê ke kiştoxî bêrê hukmkerdene. Selahîyetdaranê Tirkîya qirkerdiş sey ''qezayê operasyonî'' nîşan da. Waşt ke bi nê hawayî babeta serebûtî bêra ninmayene. 8 serr ê vîyartî la hema zî sey 'qirkerdiş' nêame dîyene. Her çiqas keyeyanê Roboskî ser o tedayêka girane estba zî waştişo hempar edalet o.

'Ganî no zulm biqedîyo'

Şervan Encu wexto ke 19 serre bi ame qetilkerdene. Dadîya ci Leyla Encu vat: "Bîyî 8 serrî ganî hînî no zulm biqedo. Dewlete zanena ke kamî domanê ma kiştî. La vana 'xeletîye' bîye. Roboskî de xeletîye bîye la Til Temir û Serêkanîyê de zî bîye? Seba ke ma kurd ê ma ameyî qetilkerdene. Dewlete her kes kerd bêveng. Şervanê mi ciwan bi. La dewlete o qetil kerd. Ez edalet wazena û wazena ke qirkerî bêrê hukmkerdene."

Mehmet Alî Tosun wexto ke 21 serre bi ame qetilkerdene. Dadîya ci Fadîla Tosun vat: "34 ciwanî. Bedenê ci bombatanê dewleta tirke ra parçe parçe bibî. Domanê ma seba ke debarê xo bikê şîyêne sînor. Wexto ke ma wayîrê dewaya xo vejîyenî ma rastê şîdet û tedaya dewlete yenê. Derheqê ma de dewayî ameyî akerdene. Kesê ke wazenê şorê goran ser rastê natoranê dewlete yenê. Homa heqê ma înan rê nêverdo. Heta ke kiştoxî bêrê dîyene û hukmkerdene ma do dewaya xo dima bibê."

Osman Kaplan babîyê 5 domanan bi. Cinîya ci Pakîze Kaplan vat: "Dewe de kar çinbi, coka mêrdeyê mi şîyêne sînorî. 8 serr ê ma edalet wazenê. Faîlan ra hesab hema zî nêame perskerdene. Dewlete 34 ruhê ma qetil kerdî. Ma dewlete rê neheqîye nêkerde. Dewlete ma rê kerd. Gelo ê qt destê xo nêdanê wîjdanê xo ser. Nêvanê heqê kurdan jî estê? Heta ke ma weş bê ma do seba şehîdanê Roboskî têkoşîn bikê û dewaya xo ra fek vera nêda."

Selam Encu wexto ke 22 serre bi ame qetilkerdene. Dadîya ci Semîra Encu vat: "Keyeyê kiştoxan biraşo nêverda lajê mi xeyalanê xo bîyaro ca. Herinda ke qirkerî bêrê dîyene dewlete ma r3e dewa akerde. Çunke ma şinê goranê domananê xo ser û dewaya edaletî dima yê. Roboskî 8 serran ra nata xemgîn a û şîne de ya. Ma hewar kenê û vanê edalet.

Hamza Encu wexto ke ame qetilkerdene 20 serre bi. Dadîya ci Kadrîye Encu vat: "8 serr ê ke sey roja verêne ma şîne de yê. Heta ke edalet nêro Roboskî ma dima dewaya xo de yê. Ez waştişê şehîdan kena. Wa qirkerî bêrê dîyene û hukmkerdene."

Babîyê Şervan Encuyî Şemal Encuyî vat: "Ma zanenê ke dewlete wazena dosya pabida û seba naye bertîl dana. La ma do qet na dewa ra fek vera nêda. Ma do heta peynîye heqanê domananê xo dima yê."

Nadîr Alma wexto ke ame qetilkerdene 26 serre bi. Babîyê ci Sadil Almayî vat: "Na xeletîya dewlete ney dişmenîya dewlete ya vera kurdan a. 34 domanî hetê dewlete ra bi zanayîşî ameyî qetilkerdene. Zerrîya ma vêşena. La ma rê evanê 'Bêrê ma seba domananê şima tazmînat bidê şima.' Ma çîyêkê înan nêwazenê  ma têna wazenê ke qirkerê domananê ma bêrê dîyene û hukmkerdene. Heta ke qirkerî nêrê dîyene ma dima dosya de yê. Heta ke bedenê mi ser o gonî bigêra ez do vaja edalet, edalet, edalet...''