17ê kanûne Roja Ala Kurdistanî ya. Roja Ala Kurdistanî serra 1919î ra heta nika ameyo qebûlkeriş kişta kurdan û Kurdistanîyan ra. Nal ala mîrasê Êhsan Nûrî Paşay, Qazî Mihemedî, Melle Mistefa Barzanî ya ki teslîmê ma biya.

Na ala  ki rûmetê ma ê netewî (millî) û Kurdistanî ya, a ala ya ki rayda ci di bi hezarana şarê ma şehîd biyo, çi heyf ki ewro Rojawayê Kurdistanî di kişta PYDyiyan ra yena veşnayiş û bena hedefê heqaret û hicûman. Na helwesta xirab a qarşidê ala Kurdistanî halê texrîbat û dejenerasyênî mûsnena. Na jew jî xeylê balkêşa û cayê xemî yo.

Ewro roja berzkerdişê Ala Kurdistanî ya  ki rûmeta ma a netewî ya.

Ewro ê neheqey ê ki tarîxê ma di xeylê finî marê biyê  fina dubare benê.

Ê hicûmê ki temûza 2015in ra heta ewro bi kişten û wêrankerden a kişta dewleti ra dewam keno, bi hepiskerdena parlamenter, şaredar, siyasetmedar, rewşenbîr û rojnamevanan, bi tayinkerdena qeyyûman dewam keno.

Her çendi aşkera ya ki siyasetê xendek û barîqatan û teqnayena bombeyan sûkan miyan di çendi zerar dawo şarê ma, welatê ma û doza ma jî, labrê hewna jî PKK no siyasetê xo ê tûnî di israr kena.

Ê ki nê lejî germ kenê, verê her çî wazenê raya xebata siyasî, sivîl û demokratîk bigîrê û çertê na xebati wertera hewadê û heta nika tayn serkewtê jî.

Ewro heme rayê xebata siyasî û sivîl kurdan vero yenê girotiş û wazenê verê şarê ma bidê vera lejî (lecî). Labrê mado nêrê na kay. Şarê ma ê Kurdistanî bi tecrubeyanê xo ê serran do ray nêdo nê siyasetê lejî ki serkewo.

Ewro fayde û waştena şarê ma şîarê “ lejî rê nê, çaresereya siyasî rê e” di nimite yo. Lazimo şarê Kurdistanî bi helwesta yewbiyaye nê şîarî berd bikero û nêverdo kes ewro ra îpotek rono veraroja ma.

Lazimo dewleta Tirk bizabibo ki bi nê siyasetê xo ê ki serra 1923ine re heta ewro rameno, do nêşo tekoşîna azadî û girotişê heqê miletê kurda werte ra werzano.

Lazimo PKK jî bivîno ki bi nê teqnayişê bombeyan Îstenbol, Amed i cayê bînan di çendi zerar dano şarê ma ê kurdî, dano Kurdistanî û dano doza azadiya miletê ma. Karê winay raya siyasetê dewleta tirk ê lejî weşêrî kenê,  tirkan miyan di nijadperstey û şowenizmî xurt kenê.

Vaşûrê Kurdistanî di Pêşmergeyê qehremanî bi xoverdayiş û lejê xo ê dilsozane, hêviyê DAIŞ û dewletanê ku xeyrê miletê ma nêwazeno şiknayo ki waştê raya vera xoserbiyayena  Başûrê Kurdistanî bigîrê. Labrê aşkera yo ku ê problemê siyasî ê kurdan ê miyanê xo bi xo di raya xoserbiyayeni derg kenê. Lazimo heme partiyê siyasê ê başûrê Kurdistanî bi raya aştiyane û diyaloga heqê xo ê xoserbiyayeni bigîrê Bexdad di jew veng û helwesta netewî bê. Xoserbiyayena başûrê Kurdistanî do rûpelê da newe heme kurd û Kurdistaniyan rê akero. Lazimo heme kurdê cîhanî paştiya vaşrê Kurditanî bigîrê.

Rojawayê Kurdistanî di cayê ki TEVDEM û PYD pêkerdişê Hewlêr û Dihokî ca bikerê, çi heyf ki embazanê partiyanê ENKS û partiyanê bînan gînê kenê hepis û ray xebata înan vero gînê. Nê helwestê ki azadî û demokrasî kenê lingan bin helbet nînê qebûlkerdiş. Lazimo PYD nê siyastê xo terk bikero. Ewro ronayişê îdereyê do piya ê eskerî, siyasî, aborî ki heme partîyê kurda miyan di ca bigîrê, raya azadiya miletê ma di zerûretênda xeylê muhîm a.

Ma tekoşîna miletê xo ê rojhelatê Kurdistanî heti dê. Yewgirotiş û îtifaqê netewî ê partiyanê rojawayê Kurdistanî û bi ardimê dewletanê paştîya înan gînê do doza azadiya Kurdistanî xurtêrî bo.

Vakurê Kurdistanî di ewro yewgiroten û îtifaqêdo netewî û dermokratîk ma vero yo.

Ma şenê prensîpanê esasî ê îtifaqêdo netewî demokratîk wina tarîf bikerê: Hîmê ci qebûlkerdişê estbiyayena miletê kurd û ê Kurdistanî yo. Qebûlkerdişê ala Kurdistanî û waştişê statuyêdo siyasî qandê Kurdistanî, pêqebûlkeriş û hurmet mûsnayişê partiyanê Kurdistanî xo miyan di esasê îtifak û piya kerkerdişê netewî  Kurdistan di.

Ma ze partî û hereket ê vakurê Kurdistanî heme textîbat û travmayê ki estê jî, na merhela ki qandê ki ma bişê tekoşîna azadiya miletê xo xurtêrî bikerê, qandê ki bi heme terefê civata ma ya, ma bişê nê zextê ki ma sero estê bişiknê, ma vanê “lejî rê nê, şaresereya siyasî rê e”.

17.12.2016

HEREKETA AZADÎ, PAK, PAKURD,PDK BAKUR, PSK