Rojavayê Kurdîstanî de perwerdeyê kirdkî (kirmanckî/dimilkî) ame dayîş. Badê perwerdeyê 4 aşman pê şayîyêk sertîfîkayê wendekaran ameyî vilakerdiş.

Dezgehê Ziwanê Kurdkî yê Rojavayê Kurdîstanî reya verêne perwerdeyê kirdkî (kirmanckî/dimilkî/zazakî) da. Merhaleya verên a perwerdeyî badê 4 aşman qedîya. Semedê vilakerdişê sertîfîkayan şayîyêk amey organîzekerdiş. Şayîya ke Qamişlo de amey kerdene temsîlkarê Îdarê Xoserî, ziwannasî, roşnvîr û nuştoxî beşdarê ci bîyî.

Hemserekê Dezgehê Ziwanê Kurdkî Vîyane Cûdî ke şayîye de qisey kerd verî semedê serkewtişê înan wendekarî pîroz kerdî û vat: ''Dişmenî sey Kurdîstanî ziwanê kurdkî zî perçe kerd. Ganî semedê heme lehçeyanê kurdkî xebate bêra kerdene ke ê bêrê averberdene.'' Cûdî ard ziwan ke înan sey dezgehêkê Kurdîstanî waşt lehçeyê kirdkî bidê musnayene û cehd kenê ke heme xebatanê perwerdeyî heta sewîyeya cigêrayîş û cipersayîşî bîyarê.  Vîyane Cûdî ard ziwan ke armancê înan oyo ke heme lehçeyanê kurdkî bîyarê têhet û kurdkîya standarte aver bêrê û vat: ''Semedê averberdiş heme lehçeyan çîyo ke destê ma ra yeno ma do bikerê.''

Badê qiseykerdişan sertîfîkayê 20 wendekaran ameyî teqdîmkerdene û malimanê ke kirdkî daye musnayene dîyarî dîyaye înan. Şayîye pê deyîranê hunermende Mizgîne Tahîr, Orkestraya Domanan a Rojawanî û deyîranê kirdkî qedîyaye.