Mamosteyan hemverê qetilkerdiş, hêriş û zulmê Rejîmê Îranî tewrê derse nêbî û çalakîya roniştişî organîze kerdî. Rojhelatê Kurdistan û Îranî de çalakî dewam kenê.

Çalakîyê ke dimayê qetilkerdişê Jîna Mehsa Emînî ya 22 serrî ameye qetilkerdiş, hetê Rojhelatê Kurdistan û Îranî de dest pêkerdî, dewam kenê. Hêzê Rejîmê Îranî bi hawayêk şîdet mudaxaleyê çalakîkeran nêrazîbîyayîşê yê şarî keno. Şarê ke Rojhelatê Kurdistan û Îranî de vejîyayî kuçeyan, qetilkerdiş û tepiştişê wendekaran şermezar kerdî. Bajarê Merîwan, Sinê, Kamyaran, Bane, Seqiz, Ciwanro, Kirmaşan, Hemedan, Mehabad, Tahran, Bandar Enzelî, Lahîjan, Neishabor, Mianderod û Şîraz de wendekaran vizêr zî nêşî mekteb.

‘Mektebî baregeh nîyê'

Heyetê Koordinasyonê Sendîkayê Mamosteyan zî hewteyo vîyarte de veng dabî heme mamosteyan ke tewrê grevî bibî. Vengdayîş de ame waştiş ke tewrê dersan nêbî. Keyeyan Ra zî ame waştiş ke 2 rojan domananê xo nêşirawî mekteban. Mamostayê ke goş dayî vengdayîşî şîyî mekteban, la tewrê dersan nêbîyî. Vizêr mamostayî tewrê wendekaran çalakîya roniştişî viraştî û hêrişê hêzê rejîmî şermizar kerdî. Mamostayan dîyar kerdî ke mektebî hetê rejîmî ra bedelîyayî garnîzonan. Çalakîya roniştişî de pankartê bi nuşteyê 'Ganî mamostayê ke ameyî destbendkerdiş bêrî veradayîş' , ' Mektebî baregeh nîyî', 'Zîndan cayê mamosteyan nîyî' û ' Zindan cayê wendekaran nîyî' ameyî berzkerdiş.

Wendekaran ra siloganê 'azadîye'

Vîşêrê mamosteyan wendekarî zî xeylê bajaranê Îranî de çalakîyî pê ardî. Çalakîyan de xeylê reyan siloganê 'azadîye' ame berzkerdiş. Şar zextê hêzê rejîmî yê vera cinîyan û qanûnanê îqtîdarî şermizar kerd. goreyê xeberanê ke ameyî girewtiş, wendekarê Sinê, Mehabad, Merîwan û xeylê bajaranê bînan de çalakiyî ameyî biraştiş. Mîyanê malumatanê ke ameyî girewtiş de ame vatiş ke bajarê Sinê de hêzê rejîmî şarî ser de guleyê raşteqîn reşênayî.