Merkezê Xeberan- Îranî de çalakîyê ke dima ke vayê benzînî se ra 200 bi zêder dest pêkerd dewam kenê. Sere de Tehran, Tebrîz, Kerec, Kirman, Îsfahan, Şîraz, Bircend, Geşsaran, Îlam, Ahvaz, Zencan û Yezde de desanê şaristan, bajarek û qezayan de nawnayîşan vizêr roje û şewe dewam kerd.

Nawnayîşan sere de şaristananê Rojhelatî de 31 eyaletanê Îranî de dewam kerd. Nawnayîşî şaristan û bajerekanê Îranî û Rojhelatî de vila bîyî. YEwşeme Tehran, Tebrîz, Meşhed, Ahvaz, Îsfahan, Yezd, Kirman, Kirmanşa û Kereçe de 1080 nuqteyan de nawnayîşî ameyî kerdene.

Wendekarî Tewrê Ci Bîyî

Zaf şaristanan de dibistanan seba perwerdeyî mabên da. Şaristanan de ke dibistanan mabên da wendekarî tewrê nawnayîşan bîyî. Nê şaristanan ra yew zî Tebrîz o. Tebrîzî de bi seyan wendekarî kom bîyî û zêdekerdişê vayê benzînî şermezar kerd. Nawnayîşan de 100 banka û 50 dikan ra zêder cayî ameyî vêşnayene. Bi desan wesayîtê polîsan û birregehê hêzanê Besîcî zî ameyî vêşnayene.

Hûmara Merdeyan Bena Zêde

Ame parekerdene ke hêrişanê rêjîmê Îranî de vera nawnayîşkeran çekî ameyî xebitnayene û zaf kesî ameyî kiştene. Heta nika 12 kesî ameyî kiştene û bi seyan kesî zî birîndar bîyî. Gore tay çimeyan kesê ke merdî humara înan 30 a. Gore çimeyê fermî yê Îranî zî 1000 ra zêder kesî nawnayîşan de ameyî destbendkerdene. Herême de vizêr sibayî ra nat înternet ame girewtene. Rayberê dînî yê Ayetullah Seyîd Alî Hamaneyî paştî daye veykerdişê benzînî û seba nawnayîşan nêrazîbîyayîşê xo mojna. Hamaneyî televîzyonê dewlete de qisey kerd û vat birra vaykerdişê benzînî hetê pîsporan ra ameye girewtene û ganî bêro caardene. Parlamenterê Bokanî yê Parlamentê Îranî Qasim Osmanîyî îstîfa kerd û bi nê hawayî seba birra benzînî nêrazîbîyayîşê xo mojna.