Merkezê Xeberan- Teşkîlatê Heqanê Merdiman yê Hengawî yo ke Rjhilatê Kurdistanî de falîyet keno aşkera kerd ke, Rojhilatê Kurdistanî de cinî hem hetê camêrdan hem hetê rejîmê Îranî ra amê kiştene û înan rê xeylê zulum bîyo.

5 cinîyê Kurdî amê dardekerdiş

Goreyê raporê Hengawî rejîmê Îranî mîyanê yew serre de 5 cinîyê Kurdî îdam kerdî.

30 cinîyê Kurdî amê tewqîfkerdiş

Goreyê raporê yew serre, polîsanê rejîmê Îranî, seba ke rejîmê Îranî protesto kerdê, 30 cinîyê Kurdî tewqîf kerdî

Rojhilatê Kurdistanî de emser 31 cinîyê Kurdî hetê merdimanê xo ra  amê kiştene. 10 cinî Sine, 8 cinî Kirmanşan, 8 cinî Urmiye, 3 cinî Îlam û 1 cinî zî eyaletê Loristanî de amey kiştene. 

130 cinîyan xo kişt

Mîyanê yew serre de, Rojhilatê Kurdistanî de 130 cinî zî bi sebebê cîya-cîyayan xo kişt.

Goreyê raporê Hengawî, cinîyê ke peynîya cuya xo ardê, zafê înan seba feqîrî, şîdetê mîyanê keyeyî û bi sebebê psikolijîkî ra xo kiştê.

 77 cinî xo aliqnay, 20 cinî adir eşt bedene xo û xo vêşna, 26 cinî bi girewtişê dermanan, 7 cinî zî  bi demençe xo kişt.