Roniştişê 5 rojnamegeranê ke dewaya helîkopterî de yenê muhakemekerdene ame kerdene. Cezaya 1 serre û 3 mengan dîyaye Nazane Sala.

Wan de dewijî Servet Turgut û Osman Şîban hetê leşkeran ra helîkopterî ra ameybî wareştene û Turgutî dinyaya xo bedilnayebî. Semedo ke xebera nê serebûtî kerdbî 9ê teşrîna verêne ya 2020î de muxabîranê Ajansê Mezopotamya (MA) Adnan Bîlen û Cemîl Ugurî rê, muxabîra Jinnewsî Şehrîbane Abî û rojnamegere Nazane Sala rê dewa amebî akerdene. Dima zî bi heman sebebî muxabîra MA Zeynepe Durgut rê dewa amebî akerdene.

Roniştişê 4. yê dewa Mehkemeya Cezaya Giran a 5. ya Wanî de ame kerdene. Mehkeme de 5 rojnamegeran sûcê endamîya rêxitina ra beraat kerd û bi sûcdarîya propagandaya rêxitine cezaya 1 serre û 3 mengan dîyaye Nazane Sala û ceza peyde ameye eştene.