Nuştox Roşan Lezgîn vano, serra 2020 de hetê kitaban ra rewşa zaravaya Zazakî hol nêbî va: Tena 10-12 kitabê Zazakî ameyê çapkerdiş.

Nuştox û cigêrayox Roşan Lezgîn Rûdawî rê behsê rewşa ziwanê Kurdkî, taybetî zî rewşa zaravaya Zazakî kerd.

Bakurê Kurdistanî de mîyanê serra 2020 de 350 kitabê bi Kurmancî ameyê çapkerdiş û wendişê kitaban zî gorê serra 2019 se ra 30 zêde bi.

Roşan Lezgîn îzah kerd ke, serra 2020 de rewşa Zazakî gorê rewşa Kurmancî hol nêbî û va, “Derdorê 10-12 kitabê Zazakî  ameyê çapkerdiş. Kurdistan û dinya de qasê 5 milyon Kurdê Zaza estê. Kitabê ke ameyê çapkerdiş zî bi îmkanê şexsî ameyê çapkerdiş.”

Roşan Lezgîn derheqê kembîyayîşê çapkerdişê kitabanê Zazakî de zî vano, “Sebebê tarîxî û sosyolojîk estê. Înan ra yew zî mîyanê Kurdanê Zazayan de kulturê wendişî û nuştişî zaf newe yo. Serranê 2000î de newe newe…  Serra 2011 de ma rojnameyê yewin yê Zazakî vet.”

Roşan Lezgînî îzah kerd ke, semedê averşîyayîşê Zazakî, weşanan de pîya, seypê cadayîşê Zazakî û Kurmancî muhîm o û wîna dewam kerd, “Semedê aqilê neteweyetî  zî no muhîm o. Başûrê Kurdistanî de zaf keda ma esta, zaf şexsiyetê ma yê pîlî estê kedêka zaf pîle dayê û demamê heyatîyan de kede dayê. Ma wazenê wa televîzyonê Başûrî de qet nêbo rojêk nîm saete bultenêkê bi Zazakî bibo. Wa bîyayîşê dinya û Kurdistanî bi Zazakî zî bêrê vila kerdene.

Çavkanî: Rûdaw