Merkezê Xeberan-RSFyo ke merkezê ci Paris de yo raporê serra 2019î yê derheqê binpaykerdişê heqanê rojnamegeran de weşana.

Goreyê raporî serra 2019î de 49 rojnamegerî ameyî kiştene û goreyê serra vîyarte kiştişê rojnamegeran qasê se ra 44 kêm bi. 20 serranê peyênan de 80 rojnamegerî ameyî kiştene.

Rapor de ame vatene: "Warê şerî Sûrîye, Yemen û Afganîstan seba rojnamegeran sey di qat hîna tay bitehlûke bîyî. Nê waran de serra 2019î de 17 rojnamegerî ameyî kiştene ke par  tede 39 rojnamegerî ameybî kiştene."

RSFyî da zanayene ke welatan de ke îdîa kenê ke tede haştîye' esta hûmara rojnamegeranê ke yenê kiştene serre bi serre bena zêde. Meksîka de 10 û Amerîkaya Latîne de zî 14 rojnamegerî ameyî kiştene.

Goreyê RSFyî heta peynîya serra 2019î 389 rojnamegerî karê xo ra ameyî tepiştene û na hûmara goreyê parî se ra 12 bî zêde.

Goreyê doneyanê RSFyî Tirkîya welatanê ke seba rojanmegeran sey zindan ê ra yew a. Çîn de 120, Misir de 34, Arabîstanê Siûdî de 32, Sûrîye de 26, Tirkîya û Vîetnam de 25 rojnamegerî tepişte yê.

Labelê goreyê dezgehanê heqanê merdiman û rêxistinanê çapemenîye Tirkîya de tewr tay 100 rojnamegerî tepişte yê.

Goreyê tay çimeyan zî hûmara rojnamegeran ê tepişteyan ê Tirkîya 200 ra zêdêr a.