Navenda Nûçeyan- Cîgirê Wezîrê Derve yê Rûsyayê Mixail Bogdanov tevlîbûn HSDê di nav artêşa Sûrîyê de nirxand û got divê HSD tevlî artêşa Sûrîyê bibe.

Li ser pirsa rojnamevanan a “HSD dê kengê tevlî artêşa Sûrîyê bibe” Mixail Bogdanov got: “Çi qas zû tevlîbûna HSDê di nav artêşê Sûrîyê de pêk were dê ji bo hemû alîyan, baştir be.”

Mixail Bogdanov dîyar kir ku Rûsya amadeye  di danûstandinên navbera hikûmeta Sûrîyê û alîyên Kurdî de bibe alîkar û ji bo tevlîbûna HSD nav artêşê de, hesankarîyan bikin.

Piştî êrîşa artêşa Tirkîyê li ser Rojavayê Kurdistanê û rêkeftina leşkerî ya di navbera HSD û artêşa Sûrîyê de pirsa tevlîbûna HSDê di nava artêşa Sûrîyê de hat rojevê.

Fermandarîya HSDê tekezî li ser wê yekê dike ku ew amade ne tevlî artêşa Sûrîyê bibin lê bi mercê ku taybetmendîya HSDê di nava sîstema berevanîya Sûrîyê de bê parastin û heykela wan a leşkerî wek sazîyek serbixwe bimîne.