Merkezê Xeberan - Tesîrê kişîyayîşê eskeranê tirkan dewam keno. Rûsya îfade kerd ke ''Ganî eskerê tirkîya a herême de nêbîyêne''.

Başûrê Îdlîbî de vizêr nêmeroje ra dima artêşa tirkîya û çekdarê aye rejîmê Sûrîye rê hêriş kerd. Tayarayanê Rûsya û Sûrîye zî herême ser o bombayî varnayî û xeylî eskerê tirkîya ameyî kiştene.

Goreyê zanayîşan Cebel Zawîye, Zakum û Sehl El Gab de mabênê hûmara 79 û 113î de eskerê tirkîya merdî û xeylê leşkerî zî birîndar bîyî.

La goreyê selahîyetdaranê dewleta tirkîya 33 eskerî merdî. Reya verêne Serekkomar Recep Tayyîp Erdogan hûmara mergan eşkera kerd û vat ke 3 leskerî merdî. Walîyî dima eşkerayîyêka diyîne weşana û vat ke hûmara 22 ya, labelê nêmeyê şewe de reya hîreyîne eşkerayî da û pare kerd ke hûmara kişteyan bîya 29. Walîyî tewr peynî vat ke hûmara kişteyan 33 a.

Heto bîn ra Tirkîya de medyaya sosyale seba ke merdimî zanayîşan nêgîrê amey astengkerdene.

Hêrişî ra dima Erdoganî qesra xo de Kombîyayîşê Asayîşî kerd û kombîyayîş 6 saetî dewam kerd. Kombîyayîşî ra dima eşkerayîyêk nêamey dayene.

Eşkerayîya Rûsya: Ganî uca de nêbîyêne

Wezaretê Pawitişî yê Rûsya derheqê serebûtê Îdlîbî de eşkerayîye kerd û vat: '' eskerê tirkîya ganî a herême de nêbîyêne. Milîtananê Îdlîbî reyde eskerê tirkî zî ameyî pirodayene. Artêşa Rûsya derheqê serebûtî de gamêke eşte ke artêşa Sûrîye adirbirnayîş bikera. Hêriş hetê hêzanê Rûsya ra nêame kerdene.''