Şandeke Rêveberiya Xweser a Rojavayê Kurdistanê serdana Fransayê kir û li pêş Komîteya Peywendiyên Derve ya Parlamentoya Fransayê li ser rewşa herêmê zanyarî dan.

Şanda Rêveberiya Xweser a Rojavayê Kurdistanê ku Cîgirê Hevserokatiya Meclisa Rêveber a Rêveberiya Xweser Hemdan El Ebid û Hevseroka Meclisa Sivîl a Reqayê Leyla Mistefa pêk tê, li pêş Komîteya Peywendiyên Derve ya Parlamentoya Fransayê ligel beşdarbûna rojnamevanan, bi amadebûna hejmareke endamên parlamentoya Fransaxayê li ser geşedanên siyasî û sivîl û rewşa herêmê axivin.

Di destpêka civînê de Serokê Komîteya Peywendiyên Derve ya Parlamentoya Fransayê John Louis got derbarê Rojavayê Kurdistanê de got: “Di şert û mercên dijwar de we şerê terorê kir. We her tim hewl da pergaleke demokratîk ava bikin ku li ser wekheviya di navbera kêmneteweyan, olan û her du zeyendan de ava dibe.”

John Louis Borlange bal kişand li ser gelê Kurd û got: “Rastiyeke dîrokî heye ku nayê înkarkirin ku gelê Kurd di dirêjahiya dîrokê de rastî zilmê hat û ji mafên xwe bê par hat hiştin. Îro jî ji bo pêkanîna demokrasiyê, dabînkirina mafên Kurdan û hemû pêkhateyên din bi şêwazekê ku yekitiya Sûriyê pêk bîne, tê dikoşe. Bi vê yekê roleke girîng dilîze da ku dewleta demokratîk û aram were avakirin ku mafên hemûyan misoger dike."

Cîgirê Hevserokatiya Meclisa Rêveber Hemdan El Ebid bal kişan ser hevkariya Fransayê ya ji bo Rojavayê Kurdistanê û spasiya Fransa, gel û hikumeta wê kir û got: “Ji destpêkê ve Fransa bi roleke mezin rabû û helwesteke diyar nîşan da. Her tim li kêleka gelên Bakur û Rojhilatê Sûriyê di şerê li dijî terorê de sekinî.”

 Leyla Mistefa behsa xebatên ji bo ji nû ve avakirina Reqayê kir û got ku , li herêmê gelek xebatên xizmetguzariyê kêm in.

Leyla Mistefa herwiha da zanîn ku ji ber mercên xirab û nebûna xizmetguzariyan zehmet e xelkê navçeyê vegere bo ser mal û milkên xwe.

(Rûdaw)