Eşkere bû ku Weşanxaneya Baharê, di wergera Tirkî ya berhema 12 cildî ya bi navê "El Kamil Dîrok" a Dîroknasê Îslamê yê Mezin Îbn el-Esîr (1160 - 1233) de, hevoka ku Kurdbûna Eyûbiyan îfade dike hatiye sansûrkirin.

Lêkolîner û Civaknas Adnan Firat Bayar da xuyakirin, ku di beşa pirtûkê de ku behsa eşîra Eyûbî tê kirin, peyva "Kurd" ji gotina "Xanedeya herî bi rûmet a Kurdan" hatiye derxistin û weke "eşîreke birûmet" hatiye wergerandin.

Bayar bi berawirdkirina rûpelên orîjînal û wergerandî yên berhemê sansûr belge kir.

Di metna erebî ya berhemê de, di beşa ku behsa bavê Selahaddîn Eyûbî, Necmeddîn Eyûb û maê wî Şêrko (Eseduddîn) tê kirin de “Herdu jî ji Kurdên Revvadî ne. Ev xanedan xanedana herî esilzade ya Kurdan e” dinivîse.

Li hemberî vê, di wergera Tirkî de, beşa "Kurd" jê hatiye derxistin û wekî "eslê xwe endamê eşîreke birûmet a bi navê er-Revvadî ye" hatiye wergerandin.

Civaknas Adnan Firat Bayar ji Rûdawê re, diyar kir ku di wergera Tirkî de derbarê Kurdên parçeyên din de sansûr hene û ev yek wekê “skandal” pênase kir

Adnan Bayar bal kişand ser wê yekê ku Eyûbî ji aliyê nijada xwe ve ti nakokî li ser nîne, lê li Tirkiyê bi israr tên nîqaşkirin.

Bayar tekez kir ku ev sansûra di wergerê de ji bo bihêzkirina "nakokiyan" hatiye kirin û wiha pê de çû: “Îbnul Esîr jî hevdemê Eyûbiyan û dostê Zengiyan e. Heta ku têkiliya wî bi Eyûbiyan re jî hebû. Ji ber vê yekê ev agahiyên li ser nijada Eyûbîyan çavkaniyeke girîng e. Di bingeha xwe de  Îbnul Esîr ji binî ve dawî li zemîna munaqeşeyê li ser nijada Eyûbiyan tîne.”

Civaknasê Kurd beriya niha jî sansûra ku di pirtûka ji aliyê Wezareta Perwerdehiya Tirkiyê ve hatiye wergerandin de eşkere kiribû.

Bayar ku li ser kanala xwe ya YouTube ya bi navê Adnan Firat videoyên rêze dersên dîroka Kurdî belav dike, eşkere kiribû ku beşa "Mukaddime" ya derbarê Kurdbûna Kurdan de hatiye sansûrkirin.

Berê jî li Tirkiyê çend caran sansûra wergerên biwêjên wek "Kurd" û "Kurdistan" ji aliyê weşanxaneyên cuda ve bibû rojev.