Îdîa beno ke Serekwezîro verên Ahmet Davutoglu xo hadre keno ke partîyêka newî rono û partîya ke do newe bêra ronayîş zî Dîyarbekir de bêra aşkerakerdene.

Xeylê wexto ke Ahmet Davutoglu polîtîkayanê AKP ra aciz bîyo û naye ra pawîyeno ke Ahmet Davutoglu partîyêka newî rono. Dezgeyê cigêrayîşî û zanayoxê sîyasetî îzah kenê ke, zemînê Tirkîya yo nikayîn semedê ronayîşê partîyêka newî musaît o.

Îdarekerê Sazîya Merkezê Polîtîkayan a Anqarayî Nevzat Bîngol îzah kerd ke, demêko kilm de Ahmet Davûtoglû do Diyarbekir de partîya xo ya newî aşkera bikero.
Nevzat Bîngol wina vano “ 2 serran ra pey Ahmet Davutoglu do vejîyo gêrayîş û bajaranê sey Meletî û Xarpêtî zîyaret bikero. Davutoglu dima ra zî Diyarbekir û Ruha zîyaret biko. Davutoglu do zîyaretê xo yê Dîyarbekirî de partiya xo ya newî aşkera biko. Mîyanê Partîya newî de, herêma ra akademisyen û rîsipî zî bibê. Destpêk de do Abdûllah Gul û Alî Babacan partî de ca nêgêrê û netîceyê weçînayîşê Îstanbulî ra pey do qerarê xo bidê."

Dezgeyê cigêrayîşî û zanayoxê sîyasetî îzah kenê ke, zemînê Tirkîya yo nikayîn semedê ronayîşê partîyêka newî musaît o. Îdarekerê Saziya Cigêrayîşî RAWEST Roj Esîr Gîrasûn zî va “Beno ke partîya Davûtogluyî bieşko bibo alternatîfê HDP û Ak Partî.”

Roj Esîr Gîrasûn wina dewam kerd "Qismêk kesî estê ke bi zerrî ra raya xo nêdanê Ak Partî û HDP. Nê kesî bi mecburî raya xo danê Ak Partî. Gorê mi partîyêka newî eşkena biba alternatîfê AKP û HDP."