Cinîya Îngilîze ya bi nameyê Nicky Cvane seba ke ziwanê Kurdkî bimûso amey Kurdistan û mîyanê hîrê mengan de Kurmanckî û Kirmanckî mûsa. Nicky Cvane vat ke, Mucadeleyê Azadîya Şarê Kurdî aye ser o tesîr kerdo.

 
Nicky Cvane serra 1943 de dewa Dunley a pabesteya qezaya Srourport a Severnî de amîya dinya. Cvane dewa Dunleyî de bîye pîle û bi serran dêrê dewe de perwerde da kesanê astengdaran û înan dir eleqedar bîye. Cvane, destpêkê serra 2015’î de amey Amed û xeylî nê bajarê qedîmî ra hes kerdo. Cvane vana aye bîya aşiqê Amedî û cayêkê taybet yê Amedî aye het de esto. Cvane ard ziwan ke dimayê 4 serran bi waştişê mûsayîşê ziwanê Kurdkî ameya Amed û vat, wextêko derg o aye Mucadeleyê Azadîya Şarê Kurdî nas kena û tim seba Kurdan duayan kena.

‘Ez Zerrîdarê Mucadeleyê Kurdan a’

Cvane da zanayene ke seba Kurdkî bimûso û kulturê Kurdewarî wekeno ameya Kurdistan. Cvane vat aye çende bajarê Kurdistanî de gêraya, hende ci ra hes kerdo û vat, “Kurdistan cayêko zaf xasek û dewlemend o. No erdo pîroz xeylî kultur û bawerîyan rê wayîrtî keno. Ez seba ke ziwanê Kurdkî bi hawayêkê rind û kokê ci de bimûsa bajaranê sey Amed, Mêrdîn, Şirnex, Betlîs û Wan de gêraya. Geyrê min ê nê bajaran de ez zaf çîyan mûsaya. Ziwan û kulturê Kurdan xeylî dewlemend o, merdim çiqas gêreno çîyanê neweyan mûseno. Kurdî merdimê baş ê û meymanperwer ê. Ez sere de 2015 de ameya Amed û tîya ra xeylî mutesîr bîya. Ez timî seba Kurdan duayan kena.”