Seîd Veroj

Mîna Xanima cinîya Qazî Mihemed ê Reîsêcimhûrî Komara Kurdistanî vana:
Qazî Mihemedî wendene ra zaf hes kerdê û kitabxaneyê ey pirrê kitabê erebî bî. Derheqê edebîyatî de agahîya ey zaf vêşî bî. Ey bi ziwanê erebî, îngilizî, almanî, rûsî, tirkîya azerî û kurdî zanaynê û xusûsen zî almanî û rûsî bewl zanaynê. Verêna çiqas şarê xerîb ê Awrupayî biameynê Mehabad, hetmen ameynê keyê ma û bi Qazî Mihemedî rey de qisey kerdê yan zî ey ra hetkarîye waştênê…

Rojo ke ma pê hesiyayî ke Pîşewerîyê reîsê Cimhurê Azerbaycanî remayo, Qazî Mihemedî vat: “Hey bêsîfet û bêqewl û bêqirar. To heme çî xo vîrê kerd, tena ganê xo xelas kerd. Ez zana ke remayîşê ey, do bibo sebebê rişnayîşê gunîya bi henzaran lajanê azerî. Ez bi şeref û gunîya şehîdanê Kurdistanî sowend wena ke ez do şarê xo û Mehabadî ca de nêverda. Dewlaeta Şahê Îranê do heme kerb û kînê xo mi serî ser de bîyaro labelê do şarê ma yo bêguneh nêbêro kiştene. Ez wazena bi serberzî ya bimira.”

Mîna Xanim ey ra vana: “Ez rica kena ke ti zî bi Mele Mistafayî rey de Mehabad ra vejîyê. Heyfê to ke ti bi destê dewleta Şahê Îranî bêrê kiştene.” Pêşewa Qazî Mihemed agêreno ci ra vano: “Herê birala (keynê, hembazê)! Ti vana çi? Eger ez birema miletê kurdî do mi ra vajê çi? Ên do nêvajê ke enê bêşerefî dewlete viraşt û peynî de ma û dewleta xo ca de veradayî û tena ganê xo xelas kerd? Baş o, ayê sowendê ko mi rojê îlankerdişê Cimhurîyetî meydanê Çiwarçira de vera bi henzaran kesan wend, do çi mana ey bibo? Birala (hembazê)! ti vana çi? Ez nişêna xîyanet bi mileta xo ya bêguneh bikera. Şarî bawerî bi mi kerda, paştgêrî daya mi ke ma karêko winî tarîxî Mehabad de kerd. Nika ti vana bireme! Mi soz û bext dayo mileta xo ke ez do kurd û Kurdistanî rê xîyanet nêkera. Ez bi xo mesûlê heme çî ya. Ti cinîya reîsêcimhûrê dewletêka qanûnî ya û gerek ti zaf jîrek û bi cesaret biba, pawitena şeref û namûsê kurdan zaf muhîm o.”

(Yadîgarên Komara Kurdistan, Kakşar Oremar, Weşanên Sîtav, Wan, 2019)