Çend rojan ra verî yew ciwano ke ma şinasnenîme la “wazeno ke nameyê xo nimite bimano” ame kitabxaneyî. Yew kitab herîna û waşt ke ma bide ê kesî yo ke ey ra dima do bêro kitabxaneyî. Ma zî sey ey kerd. Peyê cu ma rê yew mektube nuşte. Ma waşt ke na mektube şima de pare bikerîme.

WENDOXÊ KITABXANEYÊ MEDYAYÎ YÊ ERJÎYAYEYÎ,

Ez fikirîyena ke merdimê ke eynî mekanî ra verenê û eynî çimeyî ra feyz gêne yew sînerjîyo ke xusîsîyê înan o afirnenê. Tesîrê nê cayanê winasîyan nasnamê û şexsîyetê ma ser o tena bi wextan dewam nêkeno; eynî wextî de bi nê cayan merdimî yewbînan kenê weyî, kenê xurt. Mi zî xo ra pers kerd ke gelo ez eşkena se bikera ke na yewe bikera timûtimin. Çunke ez zaf keyf kena ke bi xo cayîyê nê mekanî ya. Çi çîyeko weş o ke nê metropolî de yew cayo winasî esto ke eşkena xo tey biseterna! Çîyo hîna weş o yo ke ez yew endama ê komelî ya ke xo tîya de seterneno!

Ez behsê Kitabxaneyê Medya kena. Ez her ke şona nê kitabxaneyî tena kitaban nêkena heqibê xo, hîsîyatê ma yê hemparî zî kena de û wina agêrena keye. Seba ke yewbînserotesîrkerdişê ma yê wendoxanê Medya hîna bikera candar, hetê kitabanê ke mi herînayê de yew kitab mi weçîna ke yadîgarê kesî yo ke mi ra pey ameyo kitabxaneyî bikera û mi no fikrê xo Selahattîn Begî ra vat. Bi temamî zerrîya mi waşt ke wendoxanê Medya reyde kitaban yadîgarê yewbînan bikerîme. Ez tede feyde vînena ke na nuqta ser o vindera ke na yewe bi temamî hetê wendoxan ra êna caardene. Ez hêvî kena ke nê parekerdiş û yewbînîserotesîrkerdişê winasî erjanê merdimîye kenê candar.

Mi kitabê xo weçînit û zîyaretkerdoxo ke mi ra dima tewr verî êno rê verda. Ez hêvî kena ke embazo ke kitabê mi reseno ci wexto ke waneno cira keyf gêno. Bi hêvîya ke rindekîye vêşî bo, weşîye de bimanerê.

YEW WENDOX

KITABXANEYÊ MEDYA DE YEW KITABÊ ŞIMA ESTO

Senî ke şima zî zanê hefteyê verî “yew wendox” ame kitabxaneyî û yew kitab herîna. Hem seba ke yadîgar kero hem bi nê hewayî merdimanê ke ey ra dima ênê de têkilî rono hem zî bi hêvîya ke no têgerayîşê ey bibo yew adet “seba merdimanê ke ey ra dima ênê” yew kitab verda. Ma zî waştişê ey ard ca û kitab da merdimo ke ey ra dima tewr verî ameyo. No fikrê nê wendoxî yew demo kilm de ame heşnayene û bala merdiman anite. Merdiman seba ke no têgerayîş dewam bikero medyaya komelkî ser o pare kerd. Seba ke bibo yew adet yewbînî de têkilîye naye ro.

Nê fikrî berê xo yê verênî dayî. No hefte yew ciwan ame û “seba merdimo ke ey ra dima êno” yew kitab verda.

Bi hêvîya her tim “seba şima Kitabxaneyê Medya de yew kitab bêro verdayene…”