Bi rayberîya Tora Ziwan û Kulturê Kurdkî û Platformê Ziwanê Kurdkî bernameyê 15’ê Gulanê Roşanê Ziwanê Kurdkî  dewam keno.

Bi rayberîya her di platforman ewro Amed de vilawekî ameyê vilakerdene û şarê Dîyarbekirî ra ame waştiş ke wa beşdarê rayşîyayîş û aktîvîteyan bibê.

Endamê her di rêxistinan û endam û rayberê PAK, PSK, HDP, BDP û KKP beşdarê vilakerdişê vilawekan bîyî.

Şarê Dîyarbekirî ra ame waştene ke, bi wesîleya Roja Ziwanê kurdkî 15ê Gulane de rayşîyayîşêk yeno kerdene û 16ê Gulane de zî konserêk yeno hadre kerdene.

Heto bîn ra bi wesîleya 15'ê Gulane Roşanê Ziwanê Kurdî Parka Mûsa Anterî de semedê tutan şayîyêk virazîya. Tutan bi deyran Roşanê Zimanê Kurdî pîroz kerd.

Ewro zî Dîyarbekir de Parka Mûsa Anterî ya ke Taxa Seyrantepeyî de ya de hetê Ma Musîcî û Komeleya Çand û Zimanên Mezopotamyayê (MED-DER) ra semedê tutan atolyeya ziwanî amey ronayene.

Xeylê tutî û welatî beşdarê bernameyî bîyî.

Bername de ewilî rayşîyayîş ame kerdene û tutan pêro pîya deyra "Ziwanê Kurdkî" vatî. 

Mososteyê Kurdkî Nesîp Gültekînî Rûpela Nû rê qisey kerd û Va; Ma bi na çalakîye wazena eleqe biane ser ziwanê Kurdkî û perwerdeyîya tutan. Tutê ma hîna zî nêeşkenê bi ziwanê xo perwerde bivînê. La nika tîya de bi desan polîsî estê. No zî mojneno ma ke, dewleta tirkîya çiqas ziwanê ma ra tersena. Bi rastî dewleta Tirkiya heta nika tutê ma asîmîle kerdî. Ma vera nê asimilasyonî xo ver danê. Merdim bi zimanê  esto. Tirkiya de meseleya tewr pîle meseleya ziwanî ya. Waştişê ma kurdan o esasî perwerdeyîya ziwanê Kurdkî û statuya Kurdan o. Ma zî zanê tena bi na çalakîye her çî safî nêbeno, la ma wazenê eleqa biance ser perwerdeyîya tutan a bi Kurdkî.

“MA KURDKÎ QISEY BIKE”

Mamoseta Rezan zî vano; Ziwanê ma ver bi xelasyayîşî şono. Şarê  ma ziwanê xo û estbîyayîşê qebûl keno. La vera ziwanê ma polîtîkayê leyminî estê. Osman Sabrî vano, biwane, biwane û biwane …  Ma zî Kurdkî biwane, binuse, qisey bike, tena keye de ney, ganî ma her ca de qisey bike û wayîrê bi ziwanê  xo vejîye.

Rayşîyayîşî ra dima alfabe û herfê kurdkî tutan rê dîyay musnayene. Tutê taxe bi boyaxan ser çamê xo xêz kerdê û ser potêko sipî çîyê ke xeyal kenê xêz kerdî.

Rûpela Nû / Dîyarbekir