Ji ber şerê û aloziyên vê dawiyê yên di navbera Yekîneyên Berxwedana Şingalê (YBŞ) û artêşa Iraqê de hejmareke malbat ji Şingalê koçber bûn.

Ji ber şerê di navbera Artêşa Iraqê û YBŞê de, di van çend rojên derbasbûyî de 1700 malbat careke din ji Şingalê koçber bûne û berê xwe dane kampên li Herêma Kurdistanê.

Hejmareke malbatên Şingalê duyemîn car e koçber dibin. Cara yekê di sala 2014an de ji ber êrişa DAIŞê, niha jî ji ber şerê YBŞ û artêşa Iraqê koçberî kampên  Duhokê bûne.

Karo Seydo di sala 2016an de ji ber hevjîna xwe vegeriya Nahiya Sinunê. Neştergeriya dil bo hevjîna wî hat kirin û bijîşk gotiye divê dûr ji qerebalixiyê bijî.  Niha cardin bi neçarî vegeran Kampa Şarya ya li Duhokê.

Koçberê Şingalê Karo Seydo got: “Kî me biparêze bila biparêze ser sera û serçavan, lê em êdî nikarin dubare koçber bibin. Ev cara duyemîn e em koçber dibin. Di dîroka Êzidiyan de ev 74 car ferman e berdewam em di koçberiyê de ne.”

Koçbera Şingalê Suda Murad jî got: “Em zêde li wê derê ditirsiyan. Hawin û tişt di hatin bi malê me diketin. Em li ber deriyê xwe rûniştibûn, hawin û doçka li ber me diketin.”

Ji sedî 90 ew malbatên ku niha ji tirsa şer revîne duyemîn car e koçber dibin. Heta niha hejmareke zêde ya vegeryana kampên Duhokê.

Pênc malbat ku ji 47 kesan pêk tê, xwe gihandina kampê û li mala bira û mamên xwe dimînin û nekarine tiştekê jî ligel xwe bibin.

Koçbera Şingalê Hediya  Behrî jî dibêje: “Me her meh 100 hezar dînar kirê dida û me pereyê elektirîkê dida. Me nedikarî li Şingalê bimînin. An bila me bikujin an bila me bo dewletkê bişînin.”

Li gor amarên Rêveberiya Koç û Koçberan li Duhokê ji sala 2014an ve  27 hezar malbatên Şingalê di nav kampan de dijîn û 37 hezar 800 malbat jî dervey kampan dijîn.

Rûdaw