Merkezê Xeberan - Parlamantoyê Tirkîya fermanê serekamar Recep Tayyîp Erdoganî hadrekarîya vurnayîşê sîstemê baroyan keno. La, endam û îdarekarê baroyan vanê ke, Hukmat wazeno heme sîstemê edeletî bierzo binê kontorolê xo.

Serekê Baroya Amedî Cîhan Aydinî bi çend hemkaranê xo, 19'ê na aşme de Amed ra bi beyanatêk dest bi rayşîyayîşê ver bi Anqara kerdbi.

Aydin vano ke, hûkmat bi vurnayîşê qanûnê baroyan wazeno baroyan qedexe biko û çend baroyanê neweyan awan biko.

Aydinî va”Hukmat wazeno baroyê ke heqanê cinîya, tutan, cemat û pêruna heqanê merdiman pawenê bêveng biko. Ma vera ney çalaki kenê.''

Xeylî wexto ke hukmatê AKP wazeno qanûnê baroyanê abuqatan bibedilno, Xutbeya Serekê Dîyanetî Alî Erbaşî ra dima baroyêk vatişê ey rexne kerdbî û aye ser Erdoganî talimat da ke wa qanûnê baroyan bibedilyo.

Çend rojîyo ke baroyanê Bakûrê Kurdistanî û Tirkîya ver bi Anqara rayîşayîş dayo dest pêkerdiş û baroyî vanê, hukmatê AKP qayîlo wa her çî binê kontrolê înan de bo. Wazeno wa no welat yewreng û yewveng bo. Ma naye qebûl nêkenê. Ma azadî wazenê.