Serekê beledîyeyê hîrê bajarê Vakurê Kurdistanî Diyarbekir, Wan û Mêrdîn ê HDP hetê hukmatê AKP ra wezîfe ra amey girewtene.

Ewro serê siba polis û cendermeyan eşt beledîyeyanê Diyarbekir, Wan û Mêrdînî ser.

Wezaretîya Karanê Zereyî ya Tirkîya aşkera kerd ke, hemşaredarê bajarê Diyarbekirî Adnan Selçûk Mizrakli, ya Wanî Bedîa Ozgokçe û yê Mêrdînî Ahmet Turk wezîfe ra amey girewtiş û herinda înan de qeyûmî ameyî tayînkerdiş.

Walîyê Wan, Dîyarbekir û Mêrdînî sey qeyûm beledîyeyan rê amey tayînkerdiş.

Beledîyeya Dîyarbekirî rê Walîyê bajarî Hasan Basrî Guzeloglu, Beledîyeya Wanî rê Mehmet Emîn Bîlmez û beledîyeya Mêrdînî rê zî Walîyê Mêrdînî Mustafa Yaman ame tayînkerdiş.

Wezaretîya Karanê Zereyî ya Tirkîya îdîa kena ke, serekê eleqeyê serekê beledîyeyan ê ke wezîfe ra amey girewtiş, bi PKK rê esto.

Weçînayîşê meheli yê 31ê Adare de; namzetê HDP yê Dîyarbekirî Adnan Selçuk Mizrakli bi se ra 62.93, namzetê HDP yê Mêrdînî Ahmet Turk bi se ra 56,24, nazmeta HDP ya Wanî Bedîa Ertan Özgökçe zî bi se ra 53.83 weçînayîş qezenc kerdbî û bibî serekê beledîyeyan.

La hukmatê AKP ke weçînayîş de vindî kerd bi zorî û bi destê qeyûman newe ra dest rona beledîyeyanê Dîyarbekir, Wan û Mêrdînî ser.