PAKî roja 18ê Teşrîna Verêna 2014 de Amed de kongreya xo viraşt û awanbîyayîşê xo îlan kerd. PAKî roja 11.12.2021 de Wezaretîya Zereyî ya Tirkîya ra ‘Belgeyê Ewraq Teslîm Girewtişî’ girewt û a roje ra hetanî ewro sey partîyêka qanûnî xebatê xo donma.

PAK, pa dewaya qefilnayîşî ya ke derheqê ey de abîyo, pa heme qedexe, astengî, zorî, zehmetî û kêmanîyan zî, têkoşînê dewaya Azadîya Kurdistanî de resayo 7 serrîya xo.

PAK Partîya Fedakaranê Kurdistanî ya.

PAK, dewamê dewaya Azadîya Kurdistanî ya 200 serran o.

PAK, 7 serrîya xo de zî her tim bi nê armancanê xo yê demê ronayîşî xebatanê xo kenê.

PAK vano, miletê Kurd û Kurdistan bê îradeyê xo, mîyanê çar dewletan de ameyo parçe kerdene, ameyo îşxalkerdene,; na zî neheqîyêka herêmî, mîyandewletî û tarîxî ya. Her çiqas ray û metodê ci nika ra nêno texmînkerdene zî, yewîya Kurdan û ya Kurdistanî bi neteweyî û bi welatî heqêko meşrû yo. Ganî netewê Kurd û komelê Kurdstanî semedê na yewîye û semedê awankerdişê na yewîtîye bieşko pê îradeyê xo yo azad qerar bido.

PAK, li Bakurî Kurdistanî da heqê tayînkerdişê qederê miletê Kurd û erdanê Kurdistanê ser o heqê xo îdare kerdişê şarê Kurdistanî paweno. PAK semedê meseleya Kurdanê ke metropolanê Tirkîya de cuyenê, semedê înan heqê ziwanî, kulturî û demokratîk wazeno.

PAK semedê Kurdê ke metropolan de zafane yê, heqê xo bi xo îdarekerdişî paweno.

Milyonan Kurdî demanê cî bi cîyayan de, rîyê sebebanê cîyayan ra, mecbûr mendê ke welatê x ora koç bikerê.PAK vano, Kurdistano azad, ca û war û welatê ke heme kurdê ke bajaranê metropolanê Tirkîya û ewropa de cuyenê yo.

PAK vana ‘Seba Kurdistanî Azadî, Kurdistan De Azadî’

PAK vano, Kurdistan welatê miletê Kurd û yê heme şaranê ke Kurdistanî de cuyenê yo. PAK vano, rayberîya Kurdistanêko azad, ganî rayberîya îradeyê miletê Kurd û yê heme şaranê ke Kurdistanî de cuyenê bo.

PAK, ray, raybaz û metodanê meşrû û bêîtaatîya sîvîl esas gêno; semedê destfînayîş, pawitiş û averberdişê destvînayîşê yasayî mucadele keno.

PAK, vano, ‘Tu partî, tu serek, tu îdeolojî, dewaya Azadîya Kurdistanî ra pîrozêr, pîlêr û qîmetêr nîyê.

PAK, Partîya heme etnîsîte, dîn, mezhep û qismanê komelê Kurdistanî ya.

PAK bê ke xo sey partîyêka ‘sosyalîst, çep, rastgêr, mihefezakar, lîberal, dîndar yan zî sekuler’ terîf biko, beranê xo heme kesê ke programê ey qebûl keno rê akerdo. Partîyêka komî, neteweyî, demokratîk ke aştîwaştox û demokratanê Kurdistanî ra ameya pê ya.

PAK, ekolêko newe yo. PAK, îcab biko xo rexne keno, tespîtkerdişê kêmasîyanê xo ra nêterseno.

PAK vana ke, çareserîya meseleya Kurde û çareserîya meseleya Kurdistanî seypê nîya.

PAK vano ‘Nika ra awankerdişê dezgeyanê Kurdistanî, Nika ra Heq û Azadî’. Semedo ke rayîrê çareserkerdişê meseleya Kurd û Kurdistanî abibo, PAK, venga şarê ma dano ke ewro ra semedê caardişê programêko maqûl ke waştişê miletê ma yê acîl bêrê ca hêzanê xo bike yew.

PAK, esasê seypeyî, pawitişê heqanê cinîyan ser o têkoşîn dano. PAK vano, ganî heme neheqî, zorî, qedexe û astengîyê qanûnî, fîîlî û komelkî yê ser cinîyan bêrê wedaritiş.

PAK, vana: ’’Êyê ke eşkenê bibê yewwa bibê yew; êyê ke nêeşkenê bibê yewwa hemkarî û îtîfaqan bikê; Êyê ke nêeşkenêîtîfaqan ronê zî wa yewbînan rêberanê dîyalogî û qiseykerdişî akê; êyê ke nêeşkenê yewbînan dir dîyalog zî ronê, wa dişmenetîya yewbînan nêkê’’

PAK vano, azadîya şarê Kurdistanî, do rayîrê cuyayîşêkê aştîyane û azad yê şarê Tirkîya zî abikero.

PAK bi pêşnîyaz, waştiş û sîyasetê xo yê viraşte ewro sîyasetê Bakûrê Kurdistanî de aktorêko sîyasî yo.

Ez 7 serrîya awanbîyayîşê PAKî de, heme ronayox, rayber, endam û hetgiranê PAKî bi can û zerrî ra bimbarek kena.

Ez 7 serrîya awanbîyayîşê PAKî de, venga pêrûna ronayox, rayber û endamanê PAKî dana ke, wa wayîrê keda xo vejîyê; semedo ke wa PAK bibo partîya ciwanan, bibo partîya cinîyan, bibo partîya heme renganê komelê Kurdistanî, ma dest bi hemleyêkê neweyî bike.

Ez serrgêra awanbîyayîşê PAKî ya 7ine de, venga heme kadroyanê azadîyaştox, demeokrat, neteweyî, Kurdistanî dana ke, bênê ma pêro-pîya wayîrê PAKî vejîyê. Hêvîyanê şarê ma pîl bike.

Biciwîyo Kurdistan, biciwîyo azadî, biciwîyo PAK"

18.10.2021

Mustafa Özçelik

Serekê Pêroyî yê PAKî