Serekê Pêroyî yê Partîya Welatparêzanê Kurdîstanî (PWK) Mustafa Ozçelîk:

Ma hêvî kenê ke serra 2025î bibo serra yewrêzîya kurdan û azadîye, aştî, demokrasî û edaletî xo reyde bîyaro

Şarê kurd û kurdîstanîyan serrekê bînî bindestîya dagirkeran, zilm û zordarîye, bi dej, azar û xeman pîya verda xo dim.

Hedîseyê ke Rojhelatê Nêzdî û Rojhelatê Mîyanênî de yê, ewro zaf fersendan zî, zaf rîsk û tehlukan pîya xo mîyan de hewênenê.

Prosesêko winasî de, ma serra 2024î ra vêrenê serra 2025î.

Hêvî û waştişê ma no yo ke serra 2025î de kulturê fedakarîye, dilsozîye, qerardayîşî, xebate, , yewrêzîye û hemkarîye mîyanê komelê kurd û kurdîstanîyan de pêk bêro, hîna hîrakerde û geşêr bibo.

Hêvî û waştişê ma no yo ke serra 2025î, Vakurê Kurdîstanî de bibo serreya geşbîyayîşê hişmendîya neteweyî, welatî, bibo serreya ke hemê hetê têkildarî seba partîyêka xurte, şarî, neteweyî, demokrate gamî bierzê; seba yewbîyayîşêko stratejîk o neteweyî û demokratîk o xurt gamî bierzê; ser waştişanê acîlanê şarê kurdî, hemkarîyêka hîrakerde pêk bêro û bi na hemkarîye hemê hetê kurdan bibê teref û muhatebê Dewleta Tirkîya. Hêvî û waştişê ma no yo ke serra 2025î de, peynî bêro şer, operasyonê leşkerî û hemê çalakîyanê çekdarîyan; rayîrê xebate û çareserîya sîyasî, demokratîk û sîvîl bêro akerdiş.

Hêvî û waştişê ma no yo ke serra 2025î de, Rojavayê Kurdîstanî de hemê partîyê kurdan îdareyêka muştereke ya leşkerî, ekonomî, sîyasî, dîplomasî ya hemê partîyanê kurdan bêro awankerdiş; hemê hetê kurdan Şamî reyde, hemê dewletan reyde, bi yew veng û yew helwest sey terefê kurdî bibê muhateb. Bi yewbîyayîşêka neteweyî, rayîr ê statuyêka sîyasî ya neteweyî bêro akerdiş.

Hêvî û waştişê ma no yo ke serra 2025î de, bi yewrêzîya hemê partîyanê sîyasîyan ê Başûrê Kurdîstanî bi hişmendîyêka neteweyî, welatî û bi yewbîyayîşêko stratejîk, hukmatê newe pêk bêro. Ma hêvî kenê ke hukmatê newe, seba yewkerdişê hêza pêşmerge û hemê dezge û beşanê îdareya Herêma Kurdîstanî, seba bicaardişê maddeya 140î, gamanê laziman bierzo.

Hêvî û waştişê ma no yo ke serra 2025î de, Rojhelatê Kurdîstanî de hemê partîyê neteweyî û welatî yewrêzîya xo awan bikerê; na rewşe û fersendan ra ke ameyê meydan sûd bigîrê û xo seba bidestardişî û pawitişê heqanê rewan ê neteweyî, kulturî û komelkî yê mayendeyî amade bikerê.

Hêvî û waştişê ma no yo ke serra 2025î de, mîyanê hêzanê her çar leteyê Kurdîstanî û dîaspora de, seba awankerdişê tor û mekanîzmaya ke bieşko koordinasyon, hemahengî, dîyalog, dayîşgirewtişî, wayîrvejîyayîşî, piştgirî, ardimî, şêwra zereyin, pîya dîyarkerdişê fikir û helwestanê muşterekan pê gêro gamî bêrê eştiş.

Hêvî û waştişê ma no yo ke serra 2025î de Rojhelatê Nêzdî, Rojhelatê Mîyanênî û hemê dinya de seba merdimîye bibo serreya cuyêka azade, demokratîke, dadwere û aştîyane.

Hêvî û waştişê ma no yo ke serra 2025î de weşîye, tendurustî û bextîyarî bibo parê cuyayîşê şarê ma.

Bi nê his û fikir û bawerîyanê xo, ez serreya neweye ya şarê ma yê Kurdîstanî û her welatê dinya de û ya hemê merdimîye pîroz kena.

31.12.2024

Mustafa Ozçelîk

Serekê Pêroyî yê Partîya Welatparêzanê Kurdîstanî (PWK)