Herwiha dibêje: Ew pilana gemar, sivikatiyek bû bi sed sal xebat û qurbanîdana gelê me. Sivikatîkirin bû bi xwîna şehîdan û wan Pêşmergeyên qehreman, yên ku di şerê terorîstên DAIŞê de Kerkûk û navçeyên din ên Kurdistanî yên derveyî îdara Herêma me parastin û li şûna hemû mirovatiyê şerê terorê dikirin. Herwiha sivikatî bû bi dengê rewa û aştiyane yê gelê Kurdistanê, ku tenê tawan ew bû, dengê xwe yê rastiyane bi guhê cîhanê gihand.

Serok Barzanî di peyama xwe de dibîje: Me pêşbîniya hemû egerekê kiribû, lê ti demê em ne li bendî wê yekê bûn, ku destekî navxweyî bi vî awayî xencerê li pişta gelê Kurdistanê bide. Wan dixwest bi nepakî û dagîrkarî û bi dare zorê, îradeya gelê me bişkînin ku îradeya azadîxwazî û peyama aştî û pêkvejiyanê ye, lê îradeya gelê me zindî ma û bi piştrastî wê azadîxwazî û peyama aştiyê, serbilind bimîne û nepakî û dagîrkarî jî serşor û şermezar be.

Serok Barzanî got jî: Armanca Şazdê Cotmehê, nehiştina kiyana Herêma Kurdistanê û bêwatekirina mafên gelê Kurdistanê bû. Tevî ku bi hevkarî û çavsaxiya destekî nepak ê navxweyî, pilaneke gellekî mezin li dijî gelê me di holê de bû, lê dema ku Pêşmerge biryara bergirî û berxwedanê da, hevkêşe hat guhertin û serbilindî ji bo gelê Kurdistanê ma.

Herwiha got: Di vê salvegera tehil de, daxwazê ji hemû aliyekî dikim rêzê li dîrok û mafên gelê Kurdistanê bigirin, siyaseta şovenî û inkarkirinê ti encamê nade û tenê şer û paşketin jê derdikeve. Herdem jî me daxwaz kiriye ku Kerkûk bibe mînaka pêkvejiyanê, lê em bazarê li ser nasnameya Kurdistanî ya Kerkûkê nakin. daxwazê ji welatiyên Kurdistanê dikim bi hêvî û hêz ve temaşeyî pêşerojê bikin, doza gelê me rewa ye û bi şer û pilan û nepakiyê, bidawî nabe. Şazdê Cotmehê ew roja tarî ye di dîroka gelê me de, ku ti carî nayê jibîrkirin û divê bibê ders ji hemû kesekî re ji gelê Kurdistanê. Silav ji bo şehîdên Kurd û Kurdistan û hemû şehîdên riya azadiyê. Silav ji bo Pêşmergeyên qehreman. Silav ji bo têkoşer û niştimanperweran.