Li Hewlêra paytext bi beşdariya Serok Mesûd Barzanî, Serokwezîr Mesrûr Barzanî, berpirsên hikûmet û partiyan û nûnerên welatên biyanî pîrozbahiya Newrozê hat lidarxistin. Serok Barzanî bi zarokên şehîdan re agirê Newrozê pêxist.

Yek ji pîrozbahiya Newroza Herêma Kurdistanê li Parka Şanedar a paytext Hewlêrê hat lidarxistin.

Di pîrozbahiyaku ji aliyê parêzgariya Hewlêrê ve hat organîzekirin ji bilî Serok Mesûd Barzanî, Serokwezîr Mesrûr Barzanî, Parêzgarê Hewlêrê Omîd Xosnav, balyoz, konsulên giştî û nûnerên welatên biyanî û gelek mêvan beşdar bûn.

Serokwezîrê Hikûmeta Herêma Kurdistanê Mesrûr Barzanî di axaftina xwe ya li vir de Cejna Newrozê li gelê Kurdistanê û mêvanan pîroz kir.

Barzanî diyar kir ku Newroz yekem roja sala nû ye û xweza bi îro nû bûye û got “Wek hûn hemû jî şahid in, xwezaya Kurdistanê roj bi roj xweştir dibe. Du daxwazên min ji we hene; Ez hêvî dikim ku hûn herin seyranê û vê xwezaya xweş bibînin, biparêzin û paqij bihêlin. Hûn jî rêzikên trafîkê bişopînin û xwe û malbata xwe biparêzin.”

Barzanî diyar kir ku Newroz sembola azadî û serketina bindestan a li hemberî zaliman e û got ku Newroz ruhê azadîxwaziya gelê Kurd xurtir dike.

Mesrûr Barzanî got “Weke hûn jî dizanin, di demên borî de em rastî gelek zehmetiyan hatin, hewl dan ku Kurdistanê û aboriya Kurdistanê bişkînin lê bi ser neketin. Hewl dan aramiya Kurdistanê têk bibin lê bi ser neketin. Hewl dan vîna me bişkînin lê bi ser neketin. Ji ber ku me pişta xwe bi Xweda, Serok Barzanî û we ve girêda.”

Mesrûr Barzanî bi bîr xist ku di peyama Newrozê ya îro ya ji bo çareserkirina pirsgirêkên navxweyî yên Herêma Kurdistanê de tîma Yekîtiya Niştimaniya Kurdistanê (YNK) vexwendiye ku vegere civînên Encûmena Wezîran.

Piştî axaftinê Serok Mesûd Barzanî li gel zarokên malbatên şehîdan agirê Newrozê pêxist.

Piştre hunermend derketin ser dikê. Beşdarên pîrozbahiyê bi govendê Newroz pîroz kirin.

Ji aliyek din ve Serok Barzanî bi niviskî jî peyamek şand û Newroza gelê kurd pîroz kir

Serok Barzanî ji bo hatina Cejna Newrozê û sersala Kurdî peyamek belav kir û tê de aştî û aramî ji bo hemû aliyan xwest.

Serok Mesûd Barzanî îro Duşemê 20ê Adara 2023an di peyama xwe ya Newrozê de pîrozbahî li malbatên şehîdan, Pêşmerge û hemû Kurdistaniyên li welêt û derve kir.

Roja Sêşem 21ê Adara 2023an yekem roja Cejna Newrozê û sala 2723 ya Kurdî ye.

Li her çar parçeyên Kurdistanê û derveyî welêt ji bo pîrozbahiyên Cejna Newrozê ku cejna neteweyî ya Kurdan aheng tên kirin.

Peyama Serok Barzanî ya Cejna Newrozê:

Bi navê Xwedayê mezin û dilovan

Bi helkefta hatina cejna Newrozê û serê sala 2723ê Kurdî pîrozbahiyê li malbatên serbilindên şehîdan û Pêşmergeyên qehreman û hemû Kurdistaniyên xweşdiviyên hundir û derveyê welat dikim û hêviya aştî û aramiyê ji bo hemû aliyek dixwazim.

Mesûd Barzanî

29ê Reşemiyê 2722ê Kurdî

20ê Adara 2023an