Serok Mesûd Barzanî derbarê biryara Dadgeha Federal ya Iraqê ya têkildarî petrola Kurdistanê de ragihand ku “Biryara Dadgeha Bilind a Federaliya Iraqê ya di derbarê petrol û gaza Herêma Kurdistanê biryareke bi tevahî siyasî ye.”

Îro Sêşemê Dadgeha Federal a Iraqê derbarê yasaya petrol û gazê ya Herêma Kurdistana de ragihand ku ew yasa dijî destûra bingehîn a rêvebiriya navendî ya Iraqê ye û divê dahatên petrolê yên bi hinardekirinê hatine bidestxistin radestî Bexdayê bên kirin.

Serok Mesûd Barzanî derbarê vê biryara Dadgeha Federal ya Iraqê de ji bo raya giştî ya Iraqî û Kurdistanî peyamek belav kir.

Serok Barzanî di peyama xwe de dibêje: “Biryara Dadgeha Bilinda Federaliya Iraqê ya di derbarê petrol û gaza Herêma Kurdistanê biryareke bi tevahî siyasî ye û li dijê destûra Iraqa Federal  e, û armanca wê dijayetîkirina Herêma Kurdistane û dijî sîstema Federaliya Iraqê ye.”

Barzanî herwiha dibêje: “Em hêvîxwazîn her du Hikûmeta Iraqî û Hikûmeta Herêma Kurdistanê bikarin li ser kêşeyan û babeta petrol û gaz bigihin rêkeftinê. Li gel vê jî ji bo hemû aliyek eşkere dikîn ku Herêma Kurdistanê bi hemû şiyana xwe ve berevaniyê li mafên xwe yên destûrî dike.”