Serok Barzanî û Wezîrê Derve yê Fransayê rewşa navçeyê guftûho kirin û Wezîrê Derve yê Fransayê spasiya rola Serok Barzanî di yekxistina hewildanan û nêzîkkirina aliyên Kurdî li Sûriyeyê kir.

Serok Mesûd Barzanî îro 23ê Nîsanê pêşwazî li Wezîrê Derve yê Fransayê Jean-Novel Barrot kir.

Di civînê de, ku Balyozê Fransayê li Iraqê Patrick Dorrel û Konsulê Fransayê li Hewlêrê Yann Braem amade bûn. Wezîrê Derve yê Fransayê spasiya Serok Barzanî kir, ji bo pêşwaziyê û tekezî li ser pêwendî û dostaniya di navbera gelê Kurdistanê û gelê Fransayê de kir û Serok Barzanî wekî endezyarê wê dostaniyê binav kir.

Ji aliyê xwe ve, Serok Barzanî spasiya gel û hikûmeta Fransayê kir, ji bo piştgiriya wan a ji bo gelê Kurdistanê di demên tengasiyê de.

Di civînê de, rewşa navxweyî ya Herêma Kurdistanê û pêwîstiya avakirina kabîneya nû di zûtirîn dem de jî hate behskirin û guftûgo û nirxandin li ser pêwendiyên di navbera Herêma Kurdistanê û Bexdayê de, hilbijartinên bê yên parlementoya Iraqê, û her weha rewşa navçe û Sûriyeyê hate kirin.

Derbarê rewşa Sûriyeyê û pêşeroja Kurdan li wî welatî de, tekezî li ser serxsitina hewildanên ji bo diyalog, navbeynkarî û yekrêziya di navbera aliyên Kurdî yên li Sûriyeyê de hate kirin. Wezîrê Derve yê Fransayê pêzanîna xwe ji bo rola Serok Barzanî di serxsitina hewldanan û nêzîkkirina aliyên Kurdî de hebû.

Derbarê pêvajoya aştiyê li Tirkiyeyê de, Serok Barzanî pêngav û hewldanên ji bo çareseriyeke aştiyane li Tirkiyeyê bilind nirxand û got ku Herêma Kurdistanê her tim amade ye û piştgiriyê dide hemû hewldanên ji bo encamdana pêvajoya aştiyê li Tirkiyeyê.

Di dawiya hevdîtinê de, Wezîrê Derve yê Fransayê bi fermî Serok Barzanî vexwend da ku serdana Parîsê bike û beşdarî merasîma vekirina cihê ku dê ji bo rêzgirtina qurbanîdana hêzên Pêşmergeyên Kurdistanê di şerê li dijî terorîstan de were vekirin, bibe.